立場新聞 Stand News

世界唔係黑白分明 唔係唔包膠就可以隨便俾小朋友睇

2016/5/13 — 15:14

早兩日有記者打嚟問我一單血腥暢銷書嘅睇法,聽完佢講個背景之後,雖然佢無提書名,但我都好肯定咁問佢:「係唔係Deep Web啊?」

記者問我,究竟創作時尺度應該點拿捏,我即刻糾正佢,Deep Web並唔係創作,大部份只係將真實個案,網上傳聞收錄,而事實同創作最大分別係,事實你點拿捏都好,都唔會改變真實發生嘅事。

廣告

坦白講,本書我睇晒,亦推薦過唔少朋友睇,對於內容尺度需唔需要包膠,又或者列為十八禁,我諗作者同出版社都好清楚地表達歉意。的確,作為成年人睇落,絕對會令自己心情低落,甚至某幾部份我睇唔落去飛咗,放係書局任意翻閱,有不洽當之處,包膠係一種負責任的形式。

同行有個已為人父嘅朋友,我忍唔住問佢點睇,佢諗都唔諗就話:「吓?我肯定睇過先俾我個女睇囉。」佢反應令我想帶出以下一點。

廣告

引述報紙內容:

“昨日社交媒體瘋傳,有家長未為意《DEEP WEB FILE#網絡奇談》的內容,買給小朋友閱讀。”

家長係選取讀物俾自己小朋友,竟然唔先睇一次本書,然後怪人無包膠呢種反智態度。有冇發現公園連氹氹轉都無?有冇發現有水池嘅地方就有圍欄?點解?因為怕出事,反觀西方國家,水塘、河道都唔會有欄,外國小朋友特別聰明?定係外國唔會有意外?

錯,因為人哋家長會教識小朋友有咩係危險,佢地會話比小朋友知,走近水邊會溺水,玩火會燒傷自己,氹氹轉太快你飛落地會受傷。

想保護自己孩子,合理。但家長要認清一點,永遠唔會依賴外物去保護自己嘅細路,你可以教佢地保護自己,佢地未識,就親身保護。見到A有問題去叫A停,見到B有問題又聲討B,與其被動去事後震驚、瘋傳,不如由一開始就睇清楚本書先買。世界上無人有責任去保護你個仔女,叫外人去保障你,同交條命比個陌生人有分別咩?

如果該家長有認真睇過本書,就會知道世界上有幾多可怕嘅事發生緊。可怕唔係呢本書,而係書描述嘅世界,你無可能叫變態殺人兇手放過受害者,你只可以叫受害者保護自己。

世界唔係黑白分明,包膠就唔睇得,唔包膠就可以隨便俾小朋友睇。

上報又好,震驚都好,你個仔女睇咗,就係睇咗。下次你想做唔小心俾仔女睇咗,然後又憤怒,又震驚嘅家長?定係好冷靜,避免意外嘅家長?自己諗。

 

原刊於作者 facebook;標題為編輯所擬

發表意見