立場新聞 Stand News

世界變了,香港變了,地產經紀從沒改變

2016/10/16 — 11:15

廿年前我哋聽CD,租影碟,拎菲林去晒相,今天仲有幾多人記得「快圖美」,「柯達」?甚至HMV都幾乎執笠,你會發覺世界變得咁快,我哋生活習慣跟以前大大唔同,之但係你要搵地產經紀幫你買樓或賣樓,你會發覺竟然係廿年不變。

點解咁講?冇錯,地產經紀做生意手法根本就冰封咗,經紀骨子裡仍然係一種心態,最緊要係賺錢,只要促成生意,背後乜都唔重要。

當然,你會話邊行唔係講盈利,向錢看,醫生咪一樣收費。確實你冇講錯,但你收咗費用,會提供專業服務,根據事實真相或專業知識去處理,唔會提供不實意見,可地產經紀就唔係。

廣告

經紀最叻講兩邊話

若然要考慮買唔買樓,經紀會好似老竇教仔咁跟你講,「快啲買喇,你睇過去十幾年,樓價係咁升,邊有跌過,唔買你就蝕底。」你可能會話:「美國隨時加息喎!」經紀會笑你冇見識:「加息?你睇美國話加息,講到𠲖家都未郁,就知道有排都未掂,況且今時今美國經濟情況,即使加都有限喇」,若然你都未心動,佢會成個芝加哥大學經濟學教授上身咁大發偉論:「歐洲放水,日本仔仲負利率,香港冇新供應,你再唔買遲啲就上唔到車。」

廣告

換個身份,若然你係業主,唔知賣唔賣層樓時,佢會咁同你講:「樓價升咗十幾年,你仲唔賣,萬一好似九七咁回調,你就知錯。」你可能會話:「賣咗隨時買唔返噃!」跟住佢會話:「唔係呀,你睇睇美國已經開始加息,今年十二月好肯定再加,你信我,明年加得更快,仲唔賣樓你就後悔。」若然你還猶疑,佢又會變身諾貝爾經濟學大師咁侃侃而談:「全球經濟不景,中國經濟開始衰,你睇香港周街吉舖,就知道未來經濟好唔掂,樓價睇經濟,未來肯定下調,冇嘢好過揸現金穩陣呀。」

市好鋤買家 市淡鋤業主

其實曾經做過經紀都聽過啲大佬點教新人做買賣,「市好時就鋤買家,市差時就鋤業主」,簡單講係當市況熾烈時,業主處於強勢,只能不斷迫買家去追價。當市差時,買家唔心急買樓,於是調轉槍頭,一味打壓業主,叫佢降價。總之喺經紀心中,促成生意攞佣係首要目標,至於過程並唔重要。

大家睇睇,幾個月前樓市有調整,啲經紀即刻呼天搶地話點慘點慘,仲誇到話衰過沙士,要政府撤招,如果唔係幾多幾多人失業(佢哋又冇諗市好時賺咗幾多錢)。今日大家睇睇,樓市又㷫烚烚,若然嗰時政府聽你講,今日樓價肯定失控,到時仲唔俾人罵到爆咩!

發表意見