立場新聞 Stand News

【世紀騙局】起 1,700 公頃人工島,住宅地隨時少過新界棕土?

2018/10/18 — 17:07

本土研究社製圖

本土研究社製圖

為咗反駁民間話一萬億會掏空庫房,一眾官員同支持填海嘅打手哩幾日異口同聲話只要填完賣地就可以賺得返。喂!又話填人工島係為咗解決貴細擠、會起七成公營房屋俾我哋?究竟想起公屋定賣地先?諗真啲,1,700 公頃真係建成嘅話,有幾多地可以賣呢?

於是我哋睇返近年幾個新發展區,洪水橋、古洞北、粉嶺北,原來得兩成面積係住宅用地!大部份都係一啲公用設施、道路基建等,古洞北同粉嶺北嗰兩成住宅地仲計埋鄉村式發展(丁屋地)入去添,咁計法好茅喎!

其中一位力撐東大嶼填海「回到本」嘅林奮強就拎沙田嚟講,話沙田有三成係住宅用地,當中又有三成(佔總面積 9%)係私營房屋地;用同樣比例計返東大嶼條數,只需要賣 9% 私樓地都可以輕易賣到一萬五千億。但東大嶼都會話咗要打造第三個商業中心喎,用住宅區為主的沙田嚟比真的好嗎?我哋睇返位處政府心目中第二個商業中心的啟德新發展區,住宅地在啟德所佔的比例係低至 11.9% 添!

廣告

好,當東大嶼真係有兩至三成土地可以起屋,即係得 340-510 公頃,而林鄭打算要喺嗰度住 70-110 萬人。當 340 公頃俾 70 萬人住,政府《2030+》長遠規劃文件預計將來公私營房屋以平均 3.6 倍住用地積比發展,除返開每人分得 188 呎咋喎!比起而家人均居住面積 161 呎唔大得幾多。而且哩個數係公私營房屋拉勻,實際上哩批私樓起喺聲稱五分鐘車程到港島嘅地方,成個政府又講到要靠賣地回本,肯定賣到貴一貴,仲好可能起啲大面積豪宅,咁公營房屋住戶分到的居住面積分分鐘仲少過而家 161 呎,私樓又唔係上車小業主買得起,根本填完都係貴細擠!

仲有,就算 340 公頃裡面有七成土地係公營房屋(實際上政府講七三比只談單位數目、唔係土地面積,公屋迫埋起到密一密係常識),公營地都只係佔 238 公頃。原來花成萬億、等二十年以上,起咁大個人工島同幾條跨海公路鐵路,真正同基層市民居住有關的用地,頂多係 238 公頃?!咁喺新界收棕地就得啦。做得棕地,就已經有車路接駁,基建成本慳好多;用最高甲級農地賠償 + 棕地特惠津貼去收,238 公頃都係 400 億就可以埋單,再比高一倍都唔及人工島造價十份一。有錢使得鬼推磨,連侯強都衝出嚟話幫你手喇,仲有咩搞唔掂?

廣告

本土研究社早前的《合棕連橫》新界棕土研究已經證實,有 723 公頃新界棕地係大片相連又好用,並未納入現時政府的發展計劃。只需要用三份一來起公營房屋,已經有 241 公頃,仲唔會沉降同俾大浪打埋嚟。

填海派一定會話棕地上面有產業要重置所以唔郁得,你哋扮聽唔到,我哋就講多次:哩 723 公頃預返三份一面積做重置、三份一修復環境、只用三份一嚟起屋都夠。早前有報道談及洪水橋的棕土重置顧問研究,預計用 24 公頃起多層式工廈 + 3.8 公頃露天貯物用地,提供的樓面面積已相當於區內八成(即原本佔地 152 公頃)的棕地作業;即使業界都只係話要多一倍地就可以安置晒全部,比例上係每 1 公頃地就可安置 6.8 公頃的棕土作業。我哋主張用三份一地來重置另外三份二嘅棕土作業真係夠哂有突。

講到尾,明明棕地已有現成基建可用、面積又夠哂,點解要搞咁大嘅世紀填海工程、起一大堆新基建同公路鐵路,真係為咗造就區區二、三百公頃住宅地「改善香港人嘅居住環境」?

其實林鄭幕後老闆、董建華牽頭嘅「團結香港基金」已經爆咗響口,話「明日大嶼」起咁多基建係當做投資、將來就會回本喎!成件事根本就係一場基建帶動天價賣地再起豪宅賣樓嘅投資遊戲,就算真係經濟一直好、地同樓一直有人買,其實香港人嘅住屋困局係一。啲。都。無。改。變。過!甚至政府都驚唔夠錢找數、放風話要發債嚟起。最後就算真係有得賺,都只會得啲有錢炒樓買地買債券嘅人賺。

話說「團結香港基金」研究部主管黃元山最叻係咩?佢從美國回流香港之前,咪喺華爾街著名嘅「雷曼兄弟」度做副總裁,發明埋啲將個世界搞到一鑊泡嘅金融衍生工具囉,近年先返嚟香港洗底之嘛。基金佬呃你十年八載,輸咗錢就話投資可升可跌唔關佢事。而家搞埋哂啲想將全港市民捲入去嘅投資騙局,真係要小心中伏呀!

 

本土研究社 Facebook

發表意見