立場新聞 Stand News

人工島要回本,即係又要整啲嘢來炒

2018/10/15 — 19:37

2018年10月14日 反對東大嶼規劃遊行

2018年10月14日 反對東大嶼規劃遊行

1,700 公頃人工島,政府放風人士保守估計四、五千億走唔甩,民間估加埋基建、交通接駁都會近萬億。至少官方唔敢否認,只係話未研究。

有人話之後賣地賺得返,包括商業用地及私人住宅地。但:

(1) 首先基本數字:即使所有移民政策不變,統計處估計人口高峰位 2043 年達 822 萬,之後回落。供過於求,真係有足夠購買力承托?定係幻想依賴內地投資者買起?若果係,即承認人工島非為港人而建?

廣告

(2) 要建得成人工島、賣到地前,先要投資數千億填海及造基建。就算分期填海,先填一半,要起碼兩條公路及鐵路走唔甩,那第一期也起碼四千億。難道不是問題?

(3) 張建宗話未來五年諗住每年 2,000-3,000 億基建,真係唔知佢計咗邊啲基建。就當有啲係起醫院呀咁,即係都有好大比例要洗。而家再加一萬億,攤長 20 年都每年 500 億,加埋本身就每年成 3,500 億,香港係咪靠賣地就夠找數?如果要為東大嶼就將其他重要民生基建推遲仲衰,好似當年政府突然為高鐵就推遲其他基建,咁仲死得人多。

廣告

(4) 賣住宅地就最終將地價成本轉嫁俾小業主啦?當樓面地價一般係售賣價四成(至少地產商前期係咁計),咁要賣幾錢樓價先夠人工島回本?商業地,係雖然商廈賣散比例較少,但都係依賴要有投資者對前景樂觀先樂意投資,但真係會一直升落去?

(5) 以為人工島建成後仲賣得成,因幻想香港經濟一直「升」落去,特別係土地樓市。不過呢幾年中國經濟已衰退中,中國政府要用儲備救市,又各地房地產泡沫化中。誰可保證 20 年後房市一直旺?真係睇路喇。

(6) 最重要,加陣陳茂波都唔敢話夠錢,所以提「發債」。發債就一定夠錢無問題喇?有人提到,咁大工程嘅發債,好可能係機構投資者唔係散戶投資者玩到。你以為俾你買到少少對沖到咁?

(7) 仲有啲人講私營化,將一啲基建 BOT 或賣出去咪又賺到錢。Come on,西隧同領展惡果,係咪未領教過?

講到最尾,為咗一個不必要的、供過於求嘅萬億人工島,然後為回本又焗住將多啲嘢賣出去、私有化,就算最後俾你 chok 到盤數回到本,咁即係重覆過往香港不斷承受私有化、地產霸權嘅惡果。想推銷造多啲地來所謂解決樓價高嗰啲人,有無太過自相矛盾?

 

作者 Facebook

發表意見