立場新聞 Stand News

人生有太多經歷,其實都係一個 now or never 的處境

2017/12/21 — 13:54

資料圖片 l Jason Jacobs @ flickr — Attribution 2.0 Generic (CC BY 2.0)

資料圖片 l Jason Jacobs @ flickr — Attribution 2.0 Generic (CC BY 2.0)

我又打算創業了。

勝算有幾大呢?問心講,真係唔知喎。我對上一次「認真」創業嘅時候,得廿幾歲。貶一貶眼,而家已經四張野啦,前後相隔十幾年,但感覺依舊,係好興奮嘅。

當然,四十歲創業,同二十歲創業,響資源上面係有點分別嘅。有啲以前行過嘅彎路,會學識盡量避免。拍檔同我計劃要搞呢一舖嘅時候,決定嘅第一件事,唔係要夾幾多錢,又或者盤生意嘅方向要點點點…而係,搵多個後生我地一截嘅人嚟夾檔。我地都老啦,好多嘢都跳唔出老舊嘅思維,唔搵個後生嘅戥一戥,呢舖唔會搞得成的。

廣告

呢個後生仔,拍檔同我心目中都有人選。後生仔做咗幾年嘢,有份好工在手。穩穩陣陣嘅話,一路做上去應該收入前途都唔會太差的。我喺度盤算緊,要點樣先說服得到佢放棄份工然後出嚟陪我哋兩件老嘢去癲…我本來準備咗好多似是而非嘅理由,點知,最後一個都唔洗用。

「CK,好呀。一齊去搏吓啦。」後生仔應承得爽快。

廣告

「要放棄份工㗎喎。」我說。

「放棄咪放棄囉。呢檔嘢,掂抑或唔掂,一年半載乜都睇到啦。一年之後,我都仲好後生遮。touch wood真係衰咗,我又唔信到時搵唔返一份同依家差唔多待遇嘅工喎。我有幾多可以輸吖。」

我跟拍檔交換了個眼神,知道呢舖,應該能夠成事了。

年輕,往往係人生最大嘅籌碼。許多事情,未必能夠穩贏,但放手一搏,即使真係輸啦,又真係輸得幾多?

要搏,就趁後生吧。現在幾十歲人睇返轉頭,發現人生有太多經歷,其實都係一個now or never的處境來的。

 

(標題為編輯所擬;原刊於作者 facebook

發表意見