立場新聞 Stand News

今年無運行

2015/4/2 — 20:01

今年死梗。幾乎身邊每一位做市場推廣的、搞廣告的、辦營銷的,要跑數的,都在呻今年無運行。以前行家之間的惡鬥,是鬥邊個贏多啲,如今是鬥邊個死遲啲。營商策略已由進攻,變成死守。零售、珠寶、鐘錶、飲食、銀行、車行、廣告……各行各業,開始瀰漫一片愁雲慘霧,表面看似風平浪靜,實質已置身風眼之中,引頸以待大風暴來臨。

我絕非誇大其辭,不少大公司管理層已經聞到「辳」味,香港過去幾年的風光日子,隨時可一不可再。環顧身邊的管理層朋友,來自各行各業,看完第一季盤數,再計一計第二季,都自覺劫數難逃,惟有狠狠削減今年的marketing budget。最誇張的,是勁減100%budget,換言之,整個marketing部門幾乎可以摺埋,咩都唔使做。

廣告

好像一位鐘錶品牌大客,去年投放千萬大搞宣傳,身光頸靚,好不風光。上月見她,眉頭深鎖,大呻生意難捱,她管轄的其中一間座落尖沙嘴黃金地段的店舖,近一個月只開出十幾張單,最大一張也不過十萬,原因是強國人消失了。「宣傳?都無數返,宣傳比邊個睇!」全年市場推廣budget cut晒,守得幾耐得幾耐。

另一個零售大客就連下屬一張一百蚊的士單都不放過。「一百蚊都係錢,可減則減,慳得一蚊得一蚊」。今年大計不是擴張,而是執舖,實行執得一間得一間,待租約一完,立刻執笠,節省皮費,還望他朝江湖再見。

廣告

不要以為奶粉客有強大的水貨客撐住就一定風光,他們同樣面臨生意縮減的挑戰。我的一位跨國奶粉大客,便把今年的宣傳開支大減30%,原因同樣是香港市場愈來愈黯淡無光。這位大客還說,短期內看不到回魂的曙光。他說,不是嗎? 內地打貪早已令香港零售業不爽,港元又愈來愈強,來港購物愈來愈貴,香港又了無新意,「鳩嗚」團此起彼落,強國人還有來港消費的理由嗎?

如此慘況絕非冰山一角,香港隨時陷入水深火熱地步。好在香港底子好可以食老本,但食得幾耐?說到底,是香港人被寵壞了,習慣了飯來張口,錢來張手,過去單靠賺強國人的錢已經無憂,一切來得太容易了。人始終是愛捨難取易,既然面前有一大個金礦任由你開採,又何須這麼辛苦,走去開拓高端科技、做研發、搞Start-up? 等得研發有成果,其他人已經老早發咗,自己還在守株待兔等運到。
現在好景不再,強國人少了,內地錢不必流香港田,而是向歐美日韓走出去,有些行業沒了強國人依傍,便開始騰騰震。好在,我們相信,香港人仲有嗰種獅子山精神,想個方法,殺出血路。香港人,是時候醒一醒,靠自己吧!

 

作者按:改寫自刊於蘋果日報的原文

發表意見