立場新聞 Stand News

今日香港,竊鉤者誅,竊國者侯

2016/9/26 — 1:36

作者製圖

作者製圖

睇到一個報導,有個女仔讀緊中學時網上賣山寨手機殼而被判罪留案底,我諗咗成個下晝,感覺很壞,不能釋懷。

根據報導:

裁判官同意事件對被告造成沉重打擊,一度問辯方曾否與控方商討以其他方式處理本案,辯方回應指,確曾致函控方查詢,惟律政司以被告犯案時已滿16歲為由,不會考慮以其他方式處理

廣告

睇住呢單新聞,我諗到出自《莊子》嘅八個字:

竊鉤者誅 竊國者侯

廣告

佢被捕時只係一個中學生,佢賣嘅係淘寶山寨貨,唔係賣白粉,唔係收UGL5000萬,唔係隨街用警棍打途人。

律政司真係鐵面無私,守行為都唔得、O.N.E.(Offer No Evidence 不提證供起訴)唔得,一定要告到個學生留案底*。呢啲咁年輕、初犯、唔係嚴重罪行,其實控方係有空間採取一個比較人性嘅做法,所以個裁判官都有問辯方有冇爭取。

順帶一問,請問UGL案同警棍隨街打人案而家點樣?

 

—————————————–

一日後,我經過荔枝角站附近有個工廈轉用途做商場嘅地方,裡面有個似係中學生賣物會嘅活動,係香港家庭福利會搞嘅。雖然賣嘅嘢真係唔算好靚,但睇到啲學生好有心機。裡面好多間學校都係賣手造番梘、Dreamcatcher、飾物、文具等等。

希望主辦單位有提啲學生唔好賣可能冇授權嘅淘寶貨,否則一陣海關殺上嚟,拉晒啲夠十六歲嘅學生,落charge告到佢地留案底為止就不得了。

我係講晦氣說話。諗起嗰個女生嘅case,好難唔晦氣。祝咁多位阿Sir、Madam一帆風順,升官發財。

 

* 呢類case亦有可能係海關企硬要檢討,不過殘忍本質一樣。

作者博客

發表意見