立場新聞 Stand News

介紹返:咩係基督教選委棄席

2016/4/14 — 11:41

資料圖片

資料圖片

【文:約書亞】

689的醜聞鍋鍋新鮮,突破眾人幻想的能力「會嚇你一跳」。大家都好想給予佢老人家休息的機會——連任,實在苦了佢(&佢一家),所以都開始都留意下這個無份參與的「選舉」。不過大家又明,政改失敗,下年的特首選舉方式原封不動,1,200人小圈子仍舊。But,大家又知唔知,基督教內近日關於「棄席」的討論?

介紹返,選舉委員會的玩法裏面,有十條友代表基督教,而產生的方法就是先在教內進行投票。「棄席」的討論,就是教內有人覺得,既然個「選舉」都運桔,無理由再玩,我PASS!

廣告

你可能會話:基督教啲野關我咩事?眾所周知,大陸出名「玻璃心」,小小風吹草動就頓成驚弓之鳥。明明《十年》一開始無咩人留意,阿爺都會手心出汗,口誅筆伐,曲線幫你做埋宣傳。1,200人減到1,190人,無左十丁友,照道理對下任特首的結果無關重要,大家都知個新特首都會係阿爺安插。偏偏「奶共」見稱的聖公會大主教鄺保羅BB最近就急急回應。事緣佢早排接受《南華早報》的專訪,就驚死人唔知咩事,肯肯定咁表明「棄席」係好唔負責任。咁同邊個負責呢?市民?當然唔會係。

戴耀廷教授就分析過相關法律,認為如果基督教真係夠膽逆阿爺意,決定PASS,十席懸空的機會極高。1,200變1,190真好落阿爺面,唔怪得咁身兼政協的鄺BB要批評棄席的討論。更重要的是,佢唔多唔少都反映左阿爺的想法,咁即係代表大陸有可能開始留意到香港的基督教內有「外國勢力」。曾經有人講過,基督教搞棄席有機會做到「動搖憲法」的效果,睇黎唔係吹下水咁簡單。畢竟,1,200席只有基督教的10席有這種討論。

廣告

所以,就算你唔係耶教徒,都可以留意下這單野。

 

作者簡介:基督教網媒《門徒媒體》編採。曾修理科,現讀文科,好歷史政治,愛遊山玩水。

發表意見