立場新聞 Stand News

「以窮養屋」的林鄭新思維

2017/11/5 — 14:29

完工前的沙田水泉澳邨(資料圖片)

完工前的沙田水泉澳邨(資料圖片)

早前林鄭個公屋封頂論成為社會焦點,不過同日明報訪問其實佢重有個好嚇人既觀點好似冇咩人關注,就係佢話水泉澳係「窮人屋邨」,「養唔起個屋邨商場」。

我想講呢種對地方既諗法係好危險的,唔係因為佢賤視窮人咁簡單,而係佢本末倒置左覺得屋邨唔係用黎服務人口,而係人口既存在就係為左服務屋邨。而當你認為呢班窮人喺某個地方對你冇咩存在價值,你就自然會好涼薄咁嫌棄佢地、想排走佢地、無所不用其極咁「幫佢地」服求養番起條屋邨,而唔係諗點樣喺個屋邨令到佢地變得冇咁窮。

如果信左呢套邏輯既人竟然係一個城市既首長,咁呢個城市就更加大獲,因為佢會導致各方面既社會政策都會變得笈笈可危:例如老人家係要黎養起個銀髮市場,唔係派全民退保俾埋呢班窮人安老;病人係要黎養起醫院,而唔係醫院用黎養著病人。再講多次,問題唔係只係賤視基層咁簡單,而係佢連自由主義現代政府最根本既存在意義——服務市民——呢一樣野都違背埋,係咁既話其實好大獲,因為基本上我地唔再需要一個純粹搵你黎做佢生意既企業型政府 (entrepreneurial government),不過我所知其實香港班統治階層裡面十個可能有九個都係咁諗野,只不過平日修辭都係會扮作話服務市民而已。

廣告

呢位政務官出身既人近日點解有呢種理解,都可能係同佢啲智囊睇左啲低質素建制研究報告所致,因為呢個論調同團結香港基金個位王于漸講既野幾乎同出一轍。

佢地最新份報告有個論點睇完都會笑出聲,就係佢為左要將公屋單位講成為「困死窮人」,就喺報告裡面羅列數字話好多公屋居民住喺新界但係喺市區番工,出現左居住同職業之間既空間錯置 (spatial mismatch),阻礙左公屋戶既工作流動性,相當低手。近日林鄭成日都拎呢個point出黎講,話不過如果我起左綠置居俾佢地買,咁就多啲唔同地方既舊公屋騰空番出黎,就可以多啲地方揀,避免窮人集中住哂同一區喎。

廣告

呢個觀點基本上完全係一派胡言。有少少常識都知,你買唔起市區私樓都係喺新界買樓去市區番工架啦,同埋你攪綠置居吸乾吸盡每一個基層20-30年既消費能力,個班人只會比公屋戶更窮更養唔起公屋商場,更加阻礙窮人既流動性,都做唔到你本來想佢地養起商場既目標,純粹就係想成日諗計仔用窮人養起公屋條數。枉有啲「有識之士」睇完佢份報告話佢寫得好,唔知係閱讀理解有問題定還是平日睇既建制報告水平更差既緣故,我真係唔知好喺邊一忽。

所謂一念天堂,一念地獄,唔識攪清人/地觀念既人走去做官,得個努力自以為好熟政策好打得,最後都只會為社會帶來一場場災難,重枉佢係讀社會科學,實在有辱學名。我相當贊成強制啲高官重新再教育必修地理,攪好基本地方既道理,比起攪國民教育更加有迫切性。

作者 facebook

發表意見