立場新聞 Stand News

企業郵箱內的奇怪電郵

2018/4/9 — 19:00

資料圖片 l 圖片來源:Vodafone Medien

資料圖片 l 圖片來源:Vodafone Medien

【文:地產界小薯】

基本上所有公司都應該有個好general嘅電郵,好似[email protected]或者[email protected], 呢D係公司嘅企業郵箱。呢D電郵inbox其實年中都收唔少奇怪email,發展商更加大鑊,鬼叫佢哋又有錢又多仇家咩。真係乜都有,以下盤點五大比較無厘頭或搞笑嘅電郵:

1)「我係你公司大老闆失散多年嘅仔!」

廣告

發展商老闆都有錢有面,唔少仲好風流,所以有好多人搏大霧認親認戚。年中真係收唔少呢類郵件,仲要講到自己有幾慘,等緊老豆接濟。有D仲話唔稀罕要認返,不過佢急住要錢應急。有D仲會警告你唔好阻頭阻勢,要將佢嘅電郵立即俾老細。其實唔止認係仔,有D會話係世姪、阿叔或舊相好添。

2)「我係你公司大老闆嘅恩人!」

廣告

潛台詞係:喂!喺時候報恩啦!俾返3、5、7億嚟駛下。佢會話,想當年我救左你老闆,詳情佢唔多講,因為一切在心中。老闆見字就會明白。嘩!好入戲呀!

3)「我地有塊地喺毛里裘斯/瓦努阿圖/馬達加斯加/或者其他偏遠又無乜點去過嘅地方,想貴司嚟投資!」

呢D電郵好似spam,睇嚟應該係一次過send俾各大發展商,睇下有冇水魚上釣。有時仲話喺唔知太平洋定地中海,有成個島可以賣俾你添。咁有冇桃花島先?除咗賣地之外,有D仲有「必賺」嘅投資方案想sell俾公司添,真係乜都有。

4)「貴公司員工XXX爭我錢,佢個PK冚X剷!」

同以前D貴利佬Fax去公司或者貼街招異曲同工,都係想係唱衰個債仔,企圖恐嚇佢,想佢D上司同事知道呢件事,要令佢無地自容,逼佢快D還錢。

5)「尊敬的(集團主席個名)先生,我想投訴(一D勁雞毛蒜嘅事)!」

呢D係芝麻綠豆但又要attention俾集團主席嘅投訴電郵。例如,發展商旗下屋苑管理員偷懶喺度食糖,或者商場用唔到張coupon等等。Inbox其實充斥住呢D大大小小投訴,通常都係forward返俾有關部門跟進。你唔會真係覺得主席得閒睇呀?

 


作者簡介: 如筆名,我係地產界嘅Small Potato,喺發展商打滾左一段時間,對呢個行業有一定認識,行內結識唔少朋友,聽咗好多八卦嘢。我專寫行內gossip同分享行內知識同經驗,令更多人對呢行有更深嘅了解。

Blog: https://www.facebook.com/propertysmallpotato/
 

發表意見