立場新聞 Stand News

你話我唔科學都係咁話 ...

2018/2/9 — 12:02

資料圖片 l Government of Prince Edward Island @ flickr —Attribution-NonCommercial-NoDerivs 2.0 Generic (CC BY-NC-ND 2.0)

資料圖片 l Government of Prince Edward Island @ flickr —Attribution-NonCommercial-NoDerivs 2.0 Generic (CC BY-NC-ND 2.0)

我自己係一個睇中醫多過睇西醫嘅人。過去幾年,其實真係冇乜食過西藥。當然,我所面對嘅都係一啲小病,就算係乜藥都唔食,都應該冇乜事嘅。響有選擇嘅情況之下,我寧願飲一碗苦到反胃嘅茶,多過食幾粒食完會有三幾日「連車都揸唔到」嘅藥丸。純綷係個人選擇,你話我唔科學都係咁話。

早前太太患咗一場大病,一場幾乎攞你命嘅大病。呢場大病,我哋中西醫都有睇。我唔相信甚麼藥廠勾結醫生諸如此類嘅說法,或者正確啲講,即使有勾結你其實都未必會有更好嘅 option。睇咗咁耐病嘅結論係,中醫也好,西醫也好,面對大病,其實都有佢明顯嘅 limitation。中藥唔係萬能,西醫亦都唔係無敵。作為病人,你希望係盡量增加生存嘅機會。所以當你見到中西醫各自嘅長處與及 limitation 之時,你會希望盡量可以結合兩種療法,取長補短。只係此動作,難度之大並非冇經歷過嘅人可以想象得到。兩種醫療系統,理念南轅北轍,某程度上雙方嘅擁護者還會互相踐踏,各不相讓。西醫話中藥唔科學,不明來歷嘅山草藥會食死人。中醫話西藥只能將病邪暫時壓住,治標唔治本,到頭來傷害更大。你信邊個?

廣告

我呢,兩個都信。好低能係咪?但我更清楚,單單靠是但一邊,都冇可能救返我太太。

世界上有好多唔同嘅療法,我唔敢講,當中有幾多其實係騙局。唯一我幾肯定嘅,係每一種醫療嘅方法,都有佢強嘅地方,亦有嘅局限同壞處。小病一宗,是但一個療法都可以輕鬆解決。大病呢?其實點樣選擇,有時都係要講吓命水的。

廣告

 

#講咗等於冇講
#一切都是命半點不由人

(標題為編輯所擬;原刊於作者 facebook)

發表意見