立場新聞 Stand News

出盡力去迎合一棵樹 然後放棄整個森林

2018/10/9 — 12:31

語言本身,我諗冇話對與錯嘅。用廣東話學中文好啲,定係普教中好啲,答咩都有人話你唔啱㗎啦。只不過,廣東話對香港人嚟講,除咗係一種語言之外,仲係一道防線,一道保持自己搵食能力嘅一道重要防線。

大陸政府想你香港人逐漸放棄廣東話,在佢地嘅立場,完全唔意外。我係佢,恐怕我亦會有如此希望。只係如果你係土生土長嘅香港人,你必須明白,所謂國策同你自身嘅利益,有冇conflict of interest。

香港人成日都認為自己係一個只能搭順風先能夠生存嘅族群,所以多年以來,都不斷去改變自己迎合別人。但從前呢個迎合嘅過程,卻不知不覺地為自己創造咗獨特嘅一面。而香港人忘記咗嘅係,現在呢一個獨特嘅面貌,先至係大家能坐上不同順風車嘅車票。九七之後,香港人繼續改變自己去迎合別人,而改變嘅力度越嚟越大。要搵理由去justify自己嘅改變,一啲都唔難,只係大家明唔明白,現在所作出嘅許多改變,其實係將自己嘅搵食能力不斷降低緊?出盡力去迎合一棵樹,然後放棄整個森林,正正係現在嘅寫照。

廣告

要做十四億人生意,唔等於要變成同十四億人一模一樣。你既然知道自己係要搭順風車才能生存的話,當你冇咗獨特嘅面貌,同一將車票,有十四億人同你爭,你真係覺得自己搶得贏?

想講嘅,唔係政治,而係打到埋身嘅搵食問題。

廣告

講緊「搵食」呀,明嗎?

(原文無題,題為編緝所擬)

作者facebook

發表意見