立場新聞 Stand News

出賣良心需要幾多錢?

2018/10/8 — 13:39

資料圖片,來源:Jimi Filipovski @Unsplash

資料圖片,來源:Jimi Filipovski @Unsplash

時不時喺腦裡面會閃過一個無聊問題:「究竟要得到幾多利益,你先願意將良心出賣?」幾個億?幾千萬?幾百萬?還是幾十萬就夠?

如果你窮到冇飯開,莫講話幾十萬,幾萬都分分鐘可以。但你眼見呢個世界會出賣良心嘅人,個個都大把錢,有啲肥到連鞋帶都縛唔到啦,錢,對佢哋仲有意義?

發財會立品,其實絕大部份人都會。認識一啲出賣良心,而且仲繼續出賣緊嘅人,錢係的確繼續賺,但早經已唔係誘因了。更大嘅原因係,自己有痛腳在人手,被人揸住個春袋。背後要你出賣良心嘅人會繼續塞錢俾你,目的係讓四週圍嘅人相信你係個貪得無厭嘅人,而當你越嚟越被孤立之後,你就會更加冇得返轉頭,只能繼續向更仆街嘅方向靠攏。

廣告

回望從前,點解會跌入如此一個陷阱裡面?一時貪念係其中一個理由,也有少量人衰咸濕,但更多嘅故事係咁嘅:一個鬱鬱不得志嘅青年人,偶然機會遇上一個佢認為一生中難得懂得欣賞自己嘅伯樂,於是在無甚防範之下向其靠攏。這位青年人意志薄弱,並極希望得到認同和所謂嘅成就,喺伯樂不斷慫恿之下,終於突破心魔,硬住頭皮做一次「違背良心」嘅壞事以求事業、財富上嘅突破。佢哋以為做一次可以金盤洗手,但結果係,就係嗰一次,痛腳出現,從此春袋就揸在別人手上。

佢發財,常人見到當然覺得唔順眼。佢做埋啲仆街嘢都發到達,點解上天咁唔公平,我做一個正人君子反而要搵朝唔得晚?但世界某程度上都係公平,佢係有錢,但俾人揸住春袋嘅感覺,唔係人人受得住的。當然,嚟到今時今日,佢只係為自己曾經嘅愚蠢而受苦,即係扺 L 死。

廣告

另,有人曾經提出過,點解賣良心嘅仆街通常都係廢廢哋,硬係冇個有啲質素嘅呢?係人都有三衰六旺,有質素嘅,即使喺最霉嘅時候,都唔會唔記得自己係咩人,有幾多真材實料,但冇質素嘅,當「居然」有人賞識你嘅一刻,你真係會以為自己係天才,係人中之龍。上釣,講到尾其實都係一個蠢字。

 

(標題為編輯所擬,原刊於作者 Facebook

發表意見