立場新聞 Stand News

副偈唔掂 — 究竟香港檔案處搜尋引擎有咩問題?

2018/7/6 — 16:36

香港前途研究計劃製圖

香港前途研究計劃製圖

自從我哋參與檔案研究,去過英國國家檔案館同觀塘檔案館之後,越來越感受到香港嘅檔案管理有幾差。今次我哋就同大家講下香港檔案處搜尋引擎有咩問題?

現時公眾於香港檔案處嘅網頁搜尋館藏,出來嘅結果只涵蓋已解封嘅檔案,一般包括編號、檔案描述同年份 — 就咁睇好似冇問題,但「館比館」就知道香港個檔案處有幾唔掂。

喺英國國家檔案館嘅網頁搜尋檔案,不單涵蓋已解封嘅檔案,仲涵蓋未解封嘅檔,咁樣我哋可以睇到成個檔案系列嘅狀況;未解封嘅檔案更可循《資訊自由法》(Freedom of Information Act)上訴,爭取佢哋重見天日。

廣告

另外,英國國家檔案館顯示嘅檔案資訊豐富好多,包括編號、檔案名稱、年份、封存年期,以及檔案涵蓋嘅部門名同主題(Subject),呢啲檔案同資料可匯出整齊「靚仔」嘅檔案列表,方便用家使用同記錄。而公眾想借閱檔案,可以提早一個工作天,喺網上直接撳粒掣就預約到閱覽室座位同想要嘅檔案,咁第二日檔案就放喺專屬於你嘅櫃桶入面,服務相當貼心。相反,喺香港檔案處預約檔案需要填妥一份預約申請表,再電郵予檔案處,麻煩得多。

我哋做檔案研究期間,仲發現香港檔案處有一個好「激氣」嘅問題,原來公眾用自己電腦搜尋館藏嘅結果同係觀塘檔案館嘅內聯網電腦有出入。檔案處回覆話因為「系統有 delay,但大致都一樣」。然而,呢個系統問題一直冇公佈,很多研究者可能因此而走漏好多檔案!

廣告

香港檔案處聲稱,一直致力提供優質服務,方便市民查閱館藏檔案,並不時檢討服務。以上香港檔案處搜尋引擎嘅四大不足,唔知又會唔會檢討,同英國國家檔案館睇齊呢?

 

#狙擊檔案處
#你個嘢壞咗喎

原刊於香港前途研究計劃 Facebook

發表意見