立場新聞 Stand News

南生圍地權揭秘

2018/3/29 — 14:47

本土研究社製圖

本土研究社製圖

近日因南生圍離奇火災 🔥,愈來愈多公眾開始要求政府進行永久保育。但係尋日環境局長黃錦星立即走出黎撥冷水 💧,話南生圍生態價值都冇乜咁重要啫,重話政府唔會收番發展商囤積啲私人地,會影響私有產權同成本貴云云,似乎係度等佢又黎下一次火災,任由佢「自然」燒焦到開發到為止。 

不過其實好少人留意,如果透過查閱當區地權索引圖,就知其實南生圍有差唔多近半既土地,本身就屬於政府土地黎,根本收都唔駛收已經喺度,位置包括左大家熟悉既橫水渡一帶、部分桉樹廊 🌲、大草地、沿著河邊一帶及南生圍東北部出租的活躍魚塘 🐟。所以其實收埋其他近百公頃私人土地做保育公園,係唔係想像中咁大規模同咁困難呢?

當然,地產商既南生圍豪宅發展項目涉及天價利益,幾十蚊呎買番黎既魚塘俾佢起到萬蚊呎豪宅,利潤可以上成千倍,但係如果政府用現時甲級農地價九百幾蚊收番,只係賺得十幾廿倍,賺到盡同要將土地利益揸乾揸淨既地產商 🤑,又點會肯賺少啲?

廣告

政府口中成日話要尊重地權人意願,但係地產商你買左塊濕地魚塘,又唔駛尊重番本身塊濕地既用途架? 在現有規劃制度裡面,你買左一塊地,唔代表你鐘意點用就點用,如果要發展就要事先向政府申請發展許可同公眾諮詢。地產商囤積左既魚塘,我地就老奉批俾你可以起豪宅? 講到底,其實只係一種地權既迷思。

重有,依家地產商成個南生圍發展項目,唔係剩係私人地個部分,而係食哂旁邊啲政府土地既大型計劃黎。點解佢要食埋我地既公家地? 原因係地產商揸手既私人地,全部都係冇馬路入既「飛地」(enclaves)。發展商唔食左公家地,根本就冇路入到去支撐佢咁大型既豪宅計劃。

廣告

即係話,只要政府一直唔特登幫佢交換土地,或者唔成日攪公私合營「借啲椅」話起單車徑實質就係起條馬路俾佢,根本俾官地包圍著既私人地就冇乜發展潛力可言,最適合做番魚塘同濕地公園,其實政府收番你塊地,有得套現,已經算係皇恩浩蕩。

俾發展商吞併政府土地就得,但俾政府收番做公眾公園,就話唔尊重地權人意願,咁佢圈政府地個陣又有冇尊重我地公家地既地權人意願?

從南生圍的地權分析,重可以睇到政府其實可以不花一分一毫,都可以保著南生圍。做法好簡單,就係政府將南生圍所有公家地以「政府撥地」方式撥給濕地公園作開放式管理,不容許與地產商換地。只係一個行政程序,就已經包起了所有地產商擁有的私人地及其發展潛力,大大解除南生圍既發展威脅,何樂而不為? 🤔

 


參考資料:

蘋果日報:回購保育?黃錦星指12個高生態價值區南生圍僅排第9

立場新聞:一百億買回南生圍

發表意見