立場新聞 Stand News

又加煙稅的政治問題

2015/1/7 — 13:59

頂,香港吸煙與健康委員會又建議政府來年加煙稅。今次更加一倍,由 38 蚊加到 76 蚊;即係每包煙售價由 55 蚊加至 93 蚊。睇《蘋果》話「委員會期望加煙稅可令本港的煙民比率由大約 10% 降至單位數字。」

問題:煙民無傷天害理,點解要好似禽流雞咁樣被趕盡殺絕?

政府話:因為健康咯。禁煙,都係為你好。

廣告

講到好似好好聽咁,其實係呃細路。

學術界祖師爺 Foucault 一 早已經有講,早在十七世紀開始,政府依一類掌權者操控人民嘅辦法,已經由「害你」發展至「愛你」。以前政府規管方法主要係行使死刑、酷刑,你反抗?封住你把口、綁住你對手。後來政府又發現咁嘅方法唔夠好,因為人民會反抗;於是佢哋學乖啦,用「教育」嘅方式去做統治。叫你愛國你唔肯,捉你坐監你反抗,咪「國民教育」你囉。咁教育係好事嘛,最少聽落係,你咪唔反抗囉。好在香港人都無咁蠢,就同你反抗到底。你睇,雨傘之後,政府又話要搞青年政策啦,我睇佢個 XX 點玩。

廣告

同樣道理,禁煙,唔使逼你坐監嘅,加稅,再宣稱係為大家健康著想。健康,梗係好啦,咁政府咪有話事權禁你囉。

真係以為政府對你咁好,只想你身體健康?係呀,你真以為政府係慈母呀你。警察一棍棍打落黎你當佢係愛之深責之切呀。你咁傻咁天真,佢梗係打 X 你啦。

政府禁煙,講到尾都係因為易於管理。點易?第一,慳水:市民病少啲,醫療系統負擔低啲;第二,慳力:市民食少啲煙,身體健康啲,病假請少啲,生產力大啲。

係政府眼中,市民唔係醫療負擔就係生產力。證據?你咪見到政府成日講話香港競爭力乜乜乜。至於市民有乜訴求?佢唔理。調查都有講市民唔開心啦,佢又有理咩?

市民,對政府來講,唔係人,只係一堆數字,一堆機器、貨物。

如果你自信仲有人性,唔想自己變咗貨物,如果你睇唔過眼被一個咁嘅政府操控。可以點做?常存自我意志,係唯一辦法。我,作為一個獨立嘅人,可以為我自己嘅健康負責,thank you very much Mr. 齊昕嘅父親,我唔需要你咁為我著想,暗角打少幾鑊我就求神拜佛啦。如果你將「民主」嘅理念提升到「人民自主」,你會明白其實反對政府大加煙稅,都係民主運動。因為我哋就係要話比政府聽,我可以為我自己嘅健康自主。我作為一個煙民,唔會逼人食二手煙,但亦唔想被任何人逼我唔食煙。你如果話禁止喺條街道一路行一路食,我都仲覺得有得傾。你加稅仲要講到明話因為想逼人唔好食?我自己條命自己管!多謝晒!

一句到尾:反加煙稅,係咁多!

發表意見