立場新聞 Stand News

又有朋友婚變了

2018/7/17 — 14:44

資料圖片,圖片來源:《相愛很難》MV片段截圖

資料圖片,圖片來源:《相愛很難》MV片段截圖

又有好朋友婚變了。

呢幾年,類似的事見得太多,真係見怪不怪了。感覺好像是,人人去到這種年紀,生了一、兩個小朋友,然後大家就一齊㩒個自爆button,跟住婚姻就一齊爆了,直頭好似方程式一樣。

爆鑊嘅前一刻,喺FB同IG上面,往往都仲見到佢地兩公婆好幸福好恩愛嘅照片,啲caption仲要係甜到外人頂唔順嗰隻。點知轉個頭,就話離婚嘞。唔講你堅係以為佢兩個係咪精神分裂。

廣告

婚變嘅故事,男方同女方所講嘅,我其實都聽好多。問心講,真正嘅賤男人同壞女人,其實唔係好多。反而「幼稚」嘅人先至係最多。咩叫做幼稚?係喺結婚嘅時候,低估咗往後人生所能給予佢地嘅壓力。結婚嘅時候,冇三十幾都廿幾啦,佢地以為自己已經長大成人。但實情係,人係會繼續成長,那管你已經係個高頭大馬嘅成年人。成長嘅過程,要面對嘅壓力有好多,隨住年齡增長,責任同壓力亦不斷增加。人到中年,生埋細路,上有高堂下有小孩份工又唔多穩…壓力達至人生嘅高峰。去到呢啲時候,兩公婆面對最強勁嘅壓力測試,大家會選擇互相扶持咁去挨過呢一段日子?抑或係承受唔住壓力,忍唔住互相埋怨?

婚變咗嘅人,對自己嘅婚變,往往都有好多解釋。老公花心有第三者?老婆自私大洗唔顧家?講得出嘅理由有大把,但絕大部份其實都只係表象,或者只係駱駝背上嘅最後一根稻草。發展成最後嘅局面,根源係兩公婆相處唔得唔開心。呢個唔開心loop一旦形成,沒有及時修正的話,婚變都只係時間問題。

廣告

婚姻從來都唔係容易,生埋細路仔條路只會更加困難。由行入教堂講我願意嘅一刻開始,無盡困難就喺前面等住你。結婚如果冇呢個心理準備,而只係為咗如童話般嘅美好憧憬而步入教堂,你婚姻嘅將來,也恐怕會凍過水。

挨過困難,先至會有童話的。重點係,縱使你有心理準備,同你一齊行入教堂嗰位,係咪都一樣有?

 

(標題為編輯所擬,原刊於作者 facebook

發表意見