立場新聞 Stand News

吉野家氣急敗壞事件

2015/10/13 — 14:53

吉野家 facebook page 截圖

吉野家 facebook page 截圖

【文:辛達】

早兩日之嘛,吉野家facebook仲好地地出po慶祝fans 破130,000 (咁零丁嘅?點解唔等到150,000先?),點知擒日就爆鑊,先出feed 自爆用緊強國米,再出feed 話已打999報警,澄清自己冇用福島出產食品云云⋯

廣告

重點,一錯再錯。

一、自揭瘡疤,送上子彈:實情吉野家都算係間正直不阿嘅企業,有心搵,你喺佢網站一樣可以搵到佢用緊嘅「日式珍珠米」源自黑龍江。但係按照依家大家對強國食品嘅信心指數,你呢下講真話唔止冇分加,仲送埋口實畀人攻擊你,真正傻豬豬。坦白冇問題,但可以少啲提嘅啫。(唔坦白又唔好喎,畀人踢爆先出嚟話自己用黑龍江米仲衰)

廣告

二、問題核心,視而不見:可能用福島食物呢個傳聞又畀人翻loop,搞到吉野家要出po 澄清,但出完po,網友留言主旋律已變成「寧吃福島,不吃強國」,呢個時候你唔止冇正視問題核心,反而咬住舊傳聞唔放,話已打 999求助,畀人感覺就係想轉移視線,避提強國生產問題,真係搵鬼可憐你?

三、氣急敗壞,報警失策:人地偉大嘅警隊先排先警告「網上犯法留言,有刑事後果」,你而家就響應佢哋,話已打999,仲要連fb cover都換埋明志。其實就算你地幾啱都好,搵警察壓網民已經錯晒,畀人感覺你就係企喺強權嗰一邊。玩得嘅,實情可以好似關家姐咁出歌自嘲,出po 話自己原來一直錯重點,嚟緊會嘗試引入其他地區嘅米,提升顧客信心;唔玩得嘅,收聲唔出feed 即可。

不過講到尾,呢啲所謂公關災難,其實都唔係幾災,唔信你一陣lunch搵間吉野家望下,照舊係排晒長龍,就算少左人,都係少一兩日。間間連鎖餐廳點都有啲「災難」發生過,若大家係咁記仇,邊間錯過就blacklist邊間,仲駛食飯嘅?今日屌完,第日咪一樣幫襯返。

所以吉野家,定啲嚟,趁人少少換走張cover,當冇件事啦。
 

原刊於廣告狂人

 

發表意見