立場新聞 Stand News

呢啲咪叫面斥不雅囉

2018/8/2 — 21:18

羅康瑞(資料圖片,來源:政府新聞處)

羅康瑞(資料圖片,來源:政府新聞處)

黃子華演完最後一場,唔怕劇透,不過都好多人講咗出嚟 — 呢次棟篤笑最令人深刻嘅一個位,就係「面斥不雅」,即係人人心中有把尺,無論你咩身份咩階層,係富人定係古惑仔,都有呢把尺,只要貼句「XXXX,面斥不雅」,大家就識自重,唔使吓吓人哋拍你片上網公審你你先知咩係唔啱,甚至公審完你都仲唔知自己唔啱。

黃子華用咗一個例子,就係馬雲拍咗套《攻守道》,講自己打贏戰狼吳京、葉問甄子丹同新少林寺李連杰。學子華話齋,馬雲同佢哋打,連「打輸嘅資格都冇」,套嘢赤裸裸話畀大家聽,有錢便可任性,便是天下無敵,呢啲就係「面斥不雅」嘅典範。

話口未完,今日有個富二代羅康瑞,接受港台節目《與 CEO 對話》時,憶起自己一段年少無知的日子。話說,1967 年工聯會帶頭暴動嗰年,佢喺澳洲留緊學,佢老豆提早給他一整年的學費及生活費,點知佢在賭場輸清光,唔敢話畀老豆聽,決定打工搵錢。返去香港,佢去老豆公司上班,月薪 800 元,老豆又唔加薪畀佢。當時羅年少氣盛,諗住闖出去,母親知道就叫老豆借錢畀佢創業。結果,老豆借咗 10 萬元畀佢,等佢 23 歲就可以做 CEO 創業,跟住變成一個好成功的企業家。

廣告

1970 年代,10 萬元係咩概念?以佢嘅月薪計,即係預支咗 125 個月嘅薪金,即係一次過攞咗應該要做十年八載才得到嘅薪金 — 唔係儲到呢個數目,係唔使扣除任何生活費淨袋。上年香港打工人嘅入息中位數係 $16,800,即係依家有人畀 210 萬你去創業 — 係畀唔係借。但係咁喎,1970 年的樓價、租金冇今日咁瘋狂 — 今日 210 萬你唔可以 full pay 買個單位,連劏房樓都唔得,但 1970 年代,十萬元你絕對可以 full pay 買個都幾大嘅單位兼有找。

即係呢,如果 1970 年有人畀十萬元你去創業,你乜都唔使做,買層樓收租,又或買返個自家鋪,你日日喺個舖頭賣唱、busking、跳大媽舞等,你都會係成功嘅「創業家」。

廣告

呢段經歷本來係無問題嘅,如果你係講人生、講浪子回頭、講宗教分享、同青少年講等等,真係冇問題,但呢個節目叫《與 CEO 對話》,即係你用一個 CEO 嘅身份出席節目,大家期望聽嘅係 CEO 點樣克服困難去經營,做生意有咩竅門等等,而唔係想知你點樣浪子回頭,告訴大家:只要你等到一個樓價租金唔瘋狂嘅 timing,搵到一個人可以預支十年嘅薪金畀你,你咁都唔成功,你真係廢 L 到冇人有。

公開分享咁嘅「CEO 成功之道」而唔面紅,呢啲咪叫面斥不雅囉。

 

原刊於作者 Facebook

發表意見