立場新聞 Stand News

唔做過一啲儍氣又熱血嘅嘢,點算讀過中學?

2016/4/19 — 21:11

循道中學數學短片〈Side Angle Side〉截圖

循道中學數學短片〈Side Angle Side〉截圖

循道中學男子組合 RHS 數學洗腦歌《Side - Angle - Side》昨晚轟動網絡,有人笑佢地低 B。取笑的人,大概唔明白中學生涯嘅浪漫。

中學時期,是人生的青澀階段,機心較細,沒有太多人生及生活顧慮,可以在進入大學及社會前讓童真作一次義無反顧嘅放縱,其實是一種幸福。

當年我同一班英華書院中同,低能嘢做到好盡,早前出嚟聚舊,我問咗條假設性問題:「若果當年有 Youtube,而有人將我地啲片放哂上網,你地估會點?」

廣告

做高級督察的同學認真答:「兩個可能:一喺會洗版,一喺會坐監。」

廣告

那些年的荒唐事,當時我們有同學用手提機拍成錄影帶,後來那同學的起心肝轉成 VCD,每人派一隻,我們每個同學的女朋友或老婆都睇過。我幾年前俾老婆睇,係我人生第一次見佢笑到失控。

RHS 當中的英文對白短劇,令我諗番起中學其中一個低能創作。

話說當年畢業早會,各畢業班要準備表演節目,我地文科班拍咗一條煤圖一雄《漂流教室》嘅真人版,故事好簡單,講我地一班同學逐個死,最後接近死 X 哂。我們個個未演過戲,第一次做,就要演繹自己死亡和面對同學死亡嘅表情。那年夏天,我體會到死亡,原來可以這樣浮誇,又可以那麼「木獨」。

那套電影,你會睇到嘔。唔係驚到嘔,唔係悶到嘔,係 Literally 嘅嘔,因為鏡頭好震,尤其那一幕大角咀地盤拍攝外星怪物追殺學生嘅畫面。那隻外星怪物,是其中一個同學屋企隻狗,我地攞個地拖拆咗支棍,將地拖套落隻狗個頭度扮怪物。那隻狗,自此有個花名,叫「地拖狗」。

為了令節目有點笑料,當時我們在過場加了一些廣告短片。其中一條,我地幫學校頹飯 Canteen 做咗個二次創作,將經典嘅「珠江橋牌玉冰燒」廣告,變咗個英文版,推廣它們的頹飯。

玉冰燒的廣告,你記得點唱嗎?

「斬料,斬料,斬大舊叉燒,嘩!油雞滷味樣樣都要,斬大舊叉燒!」

我地嘅英文版喺咁樣嘅:

「Chop it, Chop it, Chop a big roasted meat. Wah! Oily Chicken we all need, Chop a big roasted meat!」

這些低能事,今天都變成人生最美好的回憶。那些英華同學,今天變成了生意人、銀行家、會計師、老師等等,相信大家的餘下半生,都很難再如此豁出去地低能一次。這份低能過的回憶,是多麼的浪漫。

RHS,Well Done!!! 你們在全校支持下的這個表演,讓我感動到溶化,不單為自己留下美好回憶,也為學校帶來前所未有的知名度。記得明天回校給校長看看 Facebook 同 Youtube 的 View count 和各大傳統的 News Clipping,然後申請記一個「優點」。

 

P.S. 唔好問我可唔可以將中學啲片 Upload 上網,我唔想啲中同夾錢買兇殺我。

原刊於作者facebook

發表意見