立場新聞 Stand News

唔好以為做保安好易

2016/10/1 — 10:48

香港大型屋苑之一,太古城(資料圖片;圖片來源:WiNG @ wikipedia)

香港大型屋苑之一,太古城(資料圖片;圖片來源:WiNG @ wikipedia)

一提到保安呢行,未做過嘅人,第一個感覺就係:「你哋都唔駛點做,他條舒服工嚟㗎姐」其實,當中嘅辛苦,真係不足為外人道。

呢行不外乎都係嗰幾瓣,商場、住宅、寫字樓、停車場同學校嗰啲,各自有苦處,其中以住宅同商場最難。首先講商場,你唔好以為保安記嘢少過機械技工。一個場起碼幾十間鋪,大型啲嘅隨時百幾間,仲要而家有啲乜嘢租約裝修條款,啲鋪轉位你要知,裝修緊你又要知,最重要個客問你你唔可以唔知,如果唔係投訴投到你仆街。唔止咁,如果個場好似 ifc 咁大,仲衰,你要 plan 埋最簡單快捷條路,如果唔係個客過後以為你老點佢行冤枉路,又預咗俾人炳。

真係唔明啲友仔,家陣啲 smartphone 咁易用,部部都有 Google map 咁滯,可以喺置地問你郵局 headquarter 喺邊都夠膽死,唔識答又係死。即係話,你唔止要熟個場,你仲要熟埋果區。

廣告

到 workload ,你唔好以為商場有冷氣就梳乎,你睇吓家陣十個場有九個著西裝,件老西厚過有錢佬荷包,仲要加條死人呔,有啲腦細又話顧及企業形象,冷氣較到 25.5 度。大佬,咪玩啦!大熱天時,你著件 Tee 都有汗出啦!

制服已經慘,仲有企。理論上,你可以蛇去後樓梯, control 九廿幾部 cctv ,除非你阿頭針對你,否則唔會全天候 mon 住你,但出咗事唔該你準備收 warning letter 。冇咁易出事?六合彩唔見你中!自由行之後,個個商場咁多人,打交呢行見好少,除非個場有酒吧或者 disco ,你就要成日上差館,爆竊都係夜晚姐,但淨係倒瀉汽水各樣,已經隨時個個鐘頭發生啦!

廣告

冇錯,你可以話去 toilet ,佢未必吹得你漲,不過咁喎!一次兩次你過得到骨,但第三次,唔該你準備照肺。

Patrol 好似好易,但對唔住,有啲變態場係唔俾你除套仆街老西(要講埋仆街先表達到我嗰種憎恨)。如果做過呢行一定知,巡邏唔止商場公眾位,仲有廁所同埋一啲後樓梯。

理論上,返夜更應該舒服啲唔駛企,而且可以除咗件仆街老西,不過咁喎!你唔好忘記,冷氣係俾你地啲尊貴客戶享用既,我地只係 19 過 19 才子既 19 實 Q ,咪旨意個場閂咗門仲會有。

想像一下,夏天大熱天時,成個場啲門鎖晒,即係隨時成四十度,仲要巡鋪,扶手梯同𨋢呢啲,冇客就會閂,即係你大部分時間既運動量多咗,真係隨時中暑有之。

唔駛睇 YouTube ,淨係行街搭車各樣,一個禮拜起碼見一次嘈交 3D 版。可能而家香港人怨氣真係太大,有時只係唔覺意揩到人隻手,已經俾人怒睥,甚至將你老母問候,呢啲經常發生。保安工作,佢哋如果嘈起上嚟,要勸埋交,處理得唔好,隨時真係「多謝高登先」。好在,香港人多數都係屌吓老母,未至於郁手。

到住宅,除非你係做啲幾間獨立屋,戶數十隻手指數得晒嗰啲,如果你做坐座頭,首先,唔該你唔好飲咁多水,因為你去廁所嘅次數隨時十二個鐘只有兩三次。另外,以一座舊式 H 型公屋計,保守估計二百幾伙人,冇返兩、三個月時間,你都冇可能識晒啲住客,問題嚟嘞!家陣香港人係好懶嘅,懶嘅包括兩樣,唔記密碼或者懶得撳,成日要你幫佢開,但大佬呀,人地鬼叉知你乜水咩?問你嘅,你又話:「我係住客喎!你唔識我?我喺度住咗廿年喎!我個樣似賊呀?」

冇錯,佢投訴你,你阿頭未必炒你,但都係卸落你度。你估係人都開?唔好意思,撞啱有收數佬上咗去,表演欠債還錢派書法,紅油式行為藝術,你可以執包袱走人。你阿頭除非係你老豆,如果唔係唔會攬你。未必個個客都唔體諒你新黎嘅,不過真係咁多呢啲人,呢個世界就唔會你屌我,我屌你啦!

冇人guide住你先?起碼兩個月先認得晒啲客,唔會帶足你兩個月,基本上帶你埋完位就走人。分分鐘你阿頭都識唔晒啦!

曾經有個火爆底巴打,考到保安牌,問我有冇路介紹,我話:「你唔好入行,你會掟晒啲客落街」

最過份嗰次,有個客投訴完我同事,出埋警告信,條友仲唔心息,日日落 B Lee Ba La ,大吵大鬧,問呢個人點解仲喺度?我大佬怕咗佢,最後炒咗我同事。

你地睇到呢度,應該係會問一個香港人必問既問題:「講到咁慘,你可以唔做架嘛!」冇錯,我就係唔做,我寧願辛苦啲返去倒垃圾,好過賺埋都唔夠錢睇心理醫生。

發表意見