立場新聞 Stand News

回協恩中學校長李鎮洪 : 你憑咩話「鋼琴太普及,不計作音樂技能」!?

2015/11/1 — 15:06

協恩中學

協恩中學

【文:文探花】

大前日,上網睇蘋果新聞,見到有個標題寫住「協恩面試備紙巾  應付家長落淚」,我心諗,面試有咩好喊呢? 諗緊係咪啲家長耍花招搏同情,好奇禁入去睇,報導第一行盲話:「李鎮洪總結4年來的面試經驗,兩類家長最易令女兒失分,一是搶答原本應由女兒回答問題,二是縱容女兒變小公主,他及副校一見到會暗中打交叉,該女童多數校門止步」,睇到呢到都覺得呢個校長都有文有路,似係唔會對怪獸家長妥協嘅教育工作者。點知,睇到第二段個標題,叫做「鋼琴不計音樂技能」,感覺好唔對路,再睇內文,「去年有約1,500名學生報名,李指每名學生可提交最多8頁自我介紹檔案,但由於鋼琴太普及,故不計作音樂技能。」,睇完呢句,真係火都嚟!

李校長,本身我都仲對你有幾分敬意,但勢估唔到你同班怪獸家長一樣,一樣咁低水平。咩叫「鋼琴太普及,故不計作音樂技能」?! 你知唔知你呢句說話對於喜愛彈鋼琴嘅人黎講,簡直就係一種侮辱,仲難聽過講粗口呀!

廣告

原來係你眼中,一件事普及咗,就會失去佢本身嘅意義,越黎越多人識彈鋼琴,呢樣嘢就唔再係技能?! 乜你真係覺得學琴好易咩? 要學埋五線譜,要學埋樂理,手指要夠靈活,仲要經過長時間苦練,由初級去到演奏級,中間要花幾多「能人所不能」嘅精神同時間,你到底知唔知架? 如果根據你嘅邏輯,李雲迪應該一無是處,朗朗真係難登大雅,周杰倫更加才疏學淺,你話係咪呀?

李校長,我勸你就唔好睇到自己咁高,唔通你以為所有申請入讀協恩中學嘅學生去學鋼琴,都係為左你學校?! 一竹篙打一船人,公平咩?班怪獸家長要小朋友學彈鋼琴,為左要整靚個履歷,本身已經錯到離晒譜,你呢個做法,文雅啲講就係「自欺欺人」,粗都俗啲講就係「斬腳趾避沙蟲」!,同樣係多此一舉! 如果你真係想為學生好,就應該係面試嘅時候親口問下啲學生,佢地點解要學彈琴,如果發現佢地係真心鐘意嘅,你應該多加鼓勵 ; 如果發現佢地係被迫學嘅,你應該要令家長知道「勉強係無幸福架」!

廣告

李校長,香港音樂都已經病入膏肓,你唔幫手,都唔好踩多兩腳先得架!

 

作者簡介 : 廢青一名,早上做教育,夜晚做音樂,醉心填詞,最欣賞林夕老師的細膩感情,最喜愛方文山老師的詩情畫意。不想在沉默中滅亡,深信堅持才有希望。

發表意見