立場新聞 Stand News

回應陳茂波

2015/11/29 — 19:22

陳茂波 (無綫新聞截圖)

陳茂波 (無綫新聞截圖)

陳茂波又寫新blog批評我地,今次都批評都幾嚴厲,明顯成為政府重點狙擊對象。但相當慶幸,近月我地寫過幾篇明報文章解拆迷思,佢已經唔敢再講未來要發展3.5個沙田,又亦唔敢講棄元朗棕土取綠化帶,可謂收左佢半把口。但面對這頭論述機器掌握無限資源,請大家一定要支持我們的民間本土研究工作,齊齊抗衡官方知識壟斷!

而今次他又過來說我們罔顧事實,唔理性務實。好了好了,作為一個民間研究組織,老實說我們根本無法像發展局一樣掌有這麼多事實與數據,you win。

廣告

但我們問了一百萬次,要求你公開「全—港—土—地—列—表」既事實,大家咪清清楚楚討論下究竟啲龐大官地資源去左邊,有幾大,咩位置,包括政府既空置丁地呀 (932公頃),短租用地呀(2000公頃),臨時政府撥地呀 (估計過千),同埋其他政府現有空置土地。這個土地的事實我地追左你成四年,陳茂波你係盲左定聾左? 你咁鍾意事實點解你又唔向公眾公開?

我發現他最新的文章,更開始嘗試捍衛起豪宅的必要。其實我個人唔反對將一小部分土地賣地起豪宅賺地價,然後將地價轉番去民生用途(如全民退保),但這位天才局長的論證竟是這樣的:

廣告

A: 「因為土地唔適合起公屋」-->「所以用黎起豪宅」
B: 「因為香港有唔同階層」-->「所以用綠化地黎起豪宅係合理既」

喂!你一開始明明係話開發更多土地係為左解決20萬公屋輪候冊,10幾萬劏房戶既居住問題,窮人既住屋慘況原來係俾你借黎過橋架? 將綠化地賣俾地產商起豪宅係幫年青人上車嗎? 炒家買左連租唔租出街都成疑問啦。原來又過橋抽板!

本來你認認真真做小人真係冇問題,依家係你自己滿口仁義道德話土地開發係為左解決住屋問題。呃又好游說又好,呢個係你可以四處開發土地一個冠冕堂皇既公眾理由,咁你重有咩資格拎有公眾利益既綠化地去起純為私利既豪宅?

其實這一年有好多人說嘗試為我搭路找陳茂波傾計,但平生最討厭的並非真小人,而係呢種滿口仁義道德的偽基督徒,對著佢我既動物性一定會提醒我反芻。

發表意見