立場新聞 Stand News

土地真相 — 一個未完成的行動

2018/9/30 — 18:24

土地供應專責小組

土地供應專責小組

儘管日日電視報紙都見到你班政治 PR、基金佬、地產佬同打手,每日都用唔同方法登 Facebook 廣告 sell 香港話缺地、缺地、缺地。但世界嘅真相都係只有一個,香港土地問題嘅本質,係唔會因為你不斷話短缺就會由夠地變咗唔夠。

香港市民生存空間長期被擠壓,普遍都會覺得好缺地方生存,係好正常嘅事。依家講緊嘅問題係大家缺幾多、邊個缺同點分俾缺嘅人。

而你班官員就話唔好理呢啲問題,總之就缺,造咗啲地先再講。你做規劃做到咁盲目,咁大家點信得過你,造完啲地係會分到俾有需要嘅人手上,而唔係益咗大灣區、工程佬同地產佬呢?

廣告

點解話唔夠地根本只係你造出嚟嘅假象,就係因為我哋花咗好多精力讀通哂你成盤數,先發現原來你假設啲房屋用地以後都係繼續起啲好似錦繡花園嘅極低密度私樓,7 成都係預嚟起中低密度呀。

而用嚟同大家平時需要無關嘅「特別設施用地」(又想攪邊科?)又話未來要幾百公頃,討論咗咁耐,到今日都唔知你搵番嚟係起多個高球場定迪士尼呀。

廣告

經濟啲地嘅需要又重覆計算,又話咩一帶一路有好多甲級商廈需求,亂咁估,俾你填哂成個維港起哂商廈俾成條一帶一路好唔好?

單係減走哂上以呢啲水分,就已經減走差唔多成千公頃嘅假土地需求,根本條數已經唔再缺!

當你再解釋唔到落去,然後就話,其實,香港人都想住大啲,做多啲出嚟都可以儲著先……

咁你講哂啦! 想幫香港每人都住大啲,又唔見你去立法將全港住得細嘅人優先起俾佢地住大啲??你哋冇呀,虛偽,一味只係玩民粹拎劏房基層嘅苦況出嚟賣弄,做你哋想攪填海工程同公私合營嘅理由,你唔覺得自己好可恥?

除咗土地需求方面,土地供應方面就刻意隱藏、貶低同 DQ 啲選項:包括將明明 10 年內就可以全面規劃同善用嘅棕地(760 公頃)、私人遊樂場契約(300 公頃以上)、地產商囤地 (1,000 公頃),全部嘅發展潛力都打咗大折扣,話短中期只係用得 15% 咁大把,刻意貶低用現有土地解決問題嘅潛力。

俾十年時間你收地、重置,你話只係攪到 15%???有冇人你信呀,你同地產商擠牙膏式供應有咩分別呀???

仲有我哋近日做嗰份《隱藏選項》,揭示咗一早就俾土供組 DQ 咗個堆未善用官地,原來都有成 301 公頃,又喺個選項清單消失咗!

造大需求,估底供應,計出嚟咪缺地囉,唔係點先昆到小市民去揀填海同公私合營,林鄭你心目中最想做嘅選擇??

其實,我唔明呢班友成日口講務實,點解一直都咁唔務實,你冇咁大個頭就唔好帶咁大頂帽啦,依家話冇地,原來你仲要計以後繼續起啲低密度豪宅?根本只要好好善用同規劃手上嘅土地資源,已經可以滿足到大部分嘅城市需要。

所以,同啲官討論咗咁耐,我嘅結論係從頭到尾你哋根本只係借場土地大辯論過橋,諗著權貴嘅生活基本不變,窮人立錐之地都冇,你哋就繼續保留粉嶺哥爾夫球場,保障地產商工程利益繼續賺大錢,普通市民繼續幫佢供一世樓。

你哋班委任動物重要好自滿咁講,話土地大辯論終於教育到市民真係缺地啦,講白啲,根本就係一個洗腦工程。而當中有唔少傳媒同專業人士都係共謀,仲要好虛偽咁走出嚟話幫市民造地解困,又唔少市民又真係信咗條賊船。

就此公開宣告,雖然政府 set 嘅土地大辯論諮詢已經完結,我哋都消耗咗好多人力同資源,但我哋係絕對唔可以俾個土地真相埋沒,最後最開心嘅就係團結香港基金背後成個地產工程利益集團,犧牲嘅就係市民嘅公帑同埋困擾一輩子嘅住屋問題!

指出土地問題的真實面,本身就是一個未完成的行動,就由大家一齊將它完成吧!

 

作者 Facebook

發表意見