立場新聞 Stand News

坦承毛記台慶騷超時甩轆 林日曦向觀眾致歉:認真對唔住

2016/5/12 — 10:53

背景圖片來源:林日曦 Facebook / 《萬千呃like賀台慶》直播截圖

背景圖片來源:林日曦 Facebook / 《萬千呃like賀台慶》直播截圖

毛記電視昨晚舉行台慶騷嚴重超時,亦有甩轆之處,事後引發不少評論,還有人指「覺得毛記電視已經走近盡頭」。創辦人林日曦今早於facebook發文,承認節目「低於期望、好多甩轆兼非常冗長」,向觀眾「由衷地同你哋講一句,認真對唔住,對唔住」。有支持者就留言打氣,指「下次改善,繼續努力」、「繼嬻支持」。

林日曦又向同事道歉,因為他們用了很多心機和眼淚去籌備,但因編排失當而令他們得不到應有的讚賞,他最後表示,「衷心多謝所有喜歡呢個Show同埋唔喜歡呢個Show而真心畀意見我哋改善嘅觀眾」。

林日曦早於facebook發文,解釋節目出問題的原因:

廣告

瞓咗兩粒鐘醒咗,因為有啲嘢想同大家講。
尋晚完Show,雖然真係好想返屋企,但都想去一去慶功宴盡量多謝所有為呢個Show付出過努力嘅人。
我當時係忍唔住,差不多同所有見到嘅朋友道歉,因為我哋做咗一個低於期望、好多甩轆兼非常冗長嘅Show出嚟,搞到悶親大家。佢哋都好好人,猛咁話點會呀,好正喎。而我知道,呢啲都係禮貌說話嚟啫。
原先預計2小時30分嘅節目,嚴重Overrun到去3小時30分。我參與其中,點會唔知悶。各位花時間到現場同開電視睇我哋嘅觀眾,我想由衷地同你哋講一句,認真對唔住,對唔住。
個Show好多好多問題,亦出咗好多意外,其中一個最大問題,係Cue騷方面出現嚴重錯誤,場口之間連唔埋,令氣氛一高,又死寂三十秒,斷下斷下咁,現場還可以氣氛搭救,睇電視就係一場災難。Cue錯同連唔埋有好多意外原因,其中一個原因,就係好多影片都係最後一刻先Ready,搞到綵排時排唔到。點解啲片最後一刻先Ready,又係有好多原因,歸根究底,係我哋花咗太多時間去諗成個Show。講到尾,係我哋幾個負責去度嘅人嘅問題。
尋晚去逐一道歉時,肉肉麻麻尷尷尬尬咁,我係冇同班朝見口晚見面嘅同事講。但我心底裡其實最想同佢哋道歉,因為佢哋花咗好多心機、時間、汗水同眼淚去籌備、排練,但就因為我哋編排失當,搞到佢哋得唔到佢哋應得嘅一面倒讚賞,Sorry。
最後,衷心多謝所有喜歡呢個Show同埋唔喜歡呢個Show而真心畀意見我哋改善嘅觀眾。
而家係諗到乜就寫乜,冇乜上文下理。
冇咩事嘅話,我出返去試下瞓覺先。

不過,有不少支持者留言鼓勵林日曦,又指「大台」的台慶也很沉悶:

廣告

- 傻啦,巿面上有啲電視台overrun左好多年添

- 過場時間太長的確係其中一個較明顯嘅問題,高興你們也知問題所在,下次改善,繼續努力

- 氣氛斷下斷下先可以持久 你地台慶比一個做左60年既台更好,台慶現場有演唱會氣氛、去廁所撞到葉家寶、又夠爆笑互動...唯一不足既地方,我諗應該係你地到宜家都未安排預訂未來十年既台慶飛囉

- 大台台慶又好 
星光乜乜耀保良又好
咪一樣係勁多悶位~ 

- 客氣說話唔講!
有個咁肯擔帶既腦細,班同事條氣都順返D。有冇考慮選突手?益下大家!

發表意見