人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/6/28 - 17:44

報應

資料圖片,來源:Lian Xiaoxiao @Flickr

資料圖片,來源:Lian Xiaoxiao @Flickr

我係個小器鬼,唔鍾意好多人,亦都睇好多人唔順眼。對於我認為邪惡嘅壞人、卑鄙而且出賣群眾嘅小人、只懂奉承嘅奴才等等,我都極期望佢哋會得到報應。不過人老了,見得人渣多,自然就發覺,唔係每一個人渣喺佢有生之年都必定會得到應得嘅報應的。仆佢個街有啲甚至繼續榮華富貴長命百歲添。呢一樣,當然係一個極為洩氣又可悲嘅現實,但係,報應這回事,有時,真係未必會有,又或者即使有,但係我哋卻睇唔到。

所以呢,像我呢類老人家做事,會比較傾向聚焦喺我哋爭取到啲乜、能夠得到啲乜,多過將注意力集中喺希望壞人得到報應身上。當然,世上亦的確有好多情況,係需要透過別人得到報應,才能讓自己爭取到所需要嘅嘢。理論上,兩件事並無抵觸,但要明白,喺一場談判、博弈當中,「製造報應」必須係策略嘅一部份才值得做,否則會浪費精力,容易模糊了進攻嘅焦點,反而會影響勝算。

開會了,唔敢期望太多。世界充斥邪惡,但希望事情會朝住光明嘅方向發展吧。

廣告

祝大家仍能有個愉快嘅週末。

 

作者 Facebook