立場新聞 Stand News

填海已成為一小時生活圈的同義詞

2018/8/7 — 13:35

圖片來源:團結香港基金研究報告

圖片來源:團結香港基金研究報告

近日自林鄭開腔稱要繞過大辯論民意直接支持填海,到近日保皇政黨群空出來盲撐填海,都顯示填海計劃特別意有所指,到今日「團結香港基金」都走埋出嚟販賣個「加強版東大嶼都會」,講到明要攪大灣區同一小時生活圈,填海的真正意途未免過分著跡了。

其實香港有唔少人都是虛偽的,在土地大辯論唔同場合,都接觸過一些會自稱好著重生活環境同永續自然,話唔想破壞郊野公園,但就會話填海填幾多都冇所謂嘅人,唔理填海計劃啲地用嚟做啲乜總之都支持,有啲重係飽讀詩書嘅專業人士。佢哋覺得個山自己行到就算係自然,海去唔到就唔需要特別關注,我攪唔清楚呢種係哪門子嘅自然觀,所以只可以用虛偽嚟形容。

對普通香港人嚟講,填海一直係一種類似 lesser evil 嘅選項。只要將一個大填海計劃拆開十個,造低個環評影響,白海豚唔好成日死喺面前俾我睇到,呃住你填海未來係俾 5 歲劏房小朋友,間唔中睇下團結香港基金啲洗腦片,等你以為今時今日嘅填海仲好似沙田咁懷舊,整張點心紙剔剔下剔到揀哂填海嘅選項,聽下政府講香港有房屋問題全因為有「環保霸權」而唔係地產霸權,潛移默化,啲香港人係會完全接受你地最想推嘅填海。

廣告

好可惜既得利益者就是不甘寂寞,明明可以瞞天過海,佢哋偏要走出來爭風頭,開到口講明拎幾千億填 2,200 公頃海都唔係為咗你,係為咗攪「大灣區」同「一小時生活圈」,咁即係話啲樓起出嚟唔係俾你香港人住,係俾未來炒得起樓嘅大灣區人可以一小時生活圈落嚟香港生活嘅地方。

個目的唔係為咗俾你住到,而係用分身整個好似好正嘅目標,一開始講到好似好多公屋先,等你先支持政府嘅選項先,上咗隻賊船之後個計劃就會繼續向大灣區進發,俾哂啲內地專才同炒家玩。

廣告

你睇佢人口佈局,係諗住最盡起成 40 萬個單位成 110 萬人住,香港最盡嘅人口增長根據統計處去到 2043 都只係多呢個人數,加埋其他東北(15-18 萬)、洪水橋(21 萬)、新界北(25-35 萬)、五大填海區(5-10 萬),整嘅單位容額重多過本地人口咁多,全部唔跟本地需要出發亂咁吹,完全違反城市規劃基本倫理,究竟東大嶼都會係用嚟做乜大家心中有數。

多謝團結香港基金,令填海變得不再像沙田一樣天真、純粹,「填海」從此就等於支持大灣區融合,造地引進內地專才及炒家的同義詞。

 

作者 Facebook

發表意見