立場新聞 Stand News

多謝九十後

2015/7/24 — 18:54

七月三日寫咗篇《莊偉忠何德何能》,上載咗我𠵱家坐緊嘅甩皮甩骨「大班」櫈,唔捨得揼咗佢,但又成日刮損手,攪到我又愛又恨。

點知公司原來有位九十後,業餘愛好整皮具,問佢張櫈有無得救,佢話easy job,一晚就搞掂,換咗啲皮,𠵱家張櫈靚番哂,唔使揼住,地球少咗件垃圾,又慳番筆換櫈錢,我諗你哋無人反對請佢食番餐,多謝佢出咗半分力拯救地球。

廣告

時時都話,唔好貶低啲八九十後,佢哋有好多你唔識嘅才能,問題係你識唔識發掘,肯唔肯畀機會佢哋發揮,畀佢哋見到未來有希望,然後耐心等候佢哋開竅嘅一日。

上咗位嘅高層,多數唔肯承認自己只係普通人,唔識欣賞身邊嘅普通人,唔識用人,淨係識賴三賴四、捽數逼迫人,其實多多少少已經同時代脫節,無班後生幫忙進化,與時並進,遲早變恐龍,等待淘汰。

廣告

我張爛櫈同埋自己唔使淘汰住,唔係自己叻,而係身邊有好多叻過我嘅人,幫我増值,至仲有少少商業價值。一字咁淺嘅道理,個個明,以前明,就係上咗位之後,忽然唔明。奇怪!

多謝九十後。

 

原刊於作者 facebook page

發表意見