立場新聞 Stand News

大家幾耐冇睇過波?

2019/10/31 — 20:26

資料圖片,來源:政府新聞處

資料圖片,來源:政府新聞處

呢段日子,大家幾耐冇睇過波?
又或者幾耐冇好專心一致地睇一場波?

以前覺得睇波係每個 weekend 嘅指定動作,就好似卡士蘭咁講:今晚十一點你會做啲咩?

睇英超囉!睇完七點早場,再睇埋十點,繼而直落睇夜場。

廣告

踢國際賽時最難頂,因為 weekend 多數冇波睇;有波睇嘅 weekend 真係連街都唔想出,總之有波睇就萬事足。

但今時今日,有波睇又點?已經冇心情睇。

廣告

今晚有大戰呀?哦,太子嗰邊?
今晚邊個入球波好靚?唉,好嬲,黑警又濫捕!
今晚阿仙奴又輸一場。唉,屌,好嬲!聽日 xx 集會見!

明明係平日周末指定嘅活動,今日已經變得唔係乜嘢一回事。以前你可能係場場波都會睇、所有星蹤都追到貼,而家可能連噚日場比數都唔知,甚至係連有呢場波都唔知:「吓,係咩?」而最大轉變嘅係,你覺得連 miss 咗都唔再係咩一回事。

有時我都會提自己,無論幾忙幾上心,一定要搵時間做返啲「自己嘢」,點都要生活同心理平衡,所以最多係由以前睇直播,而家變睇精華睇比數就算,至少喺轉變中保持少少不變。

唔係對睇波冇咗興趣,而係有啲嘢重要過睇波,久而久之,令我哋冇咗睇波嘅慾望。

不過你問我哋,其實每個人都好希望可以坐定定睇返場直播,有邊個唔想輕鬆睇場波講下波經?但呢一刻,可以放棄一啲享受,換取更多往後嘅自由,呢刻睇少場波又有乜所謂?

我唔係想放負,只係聽到身邊有一位經常睇波嘅朋友講起,自己呢段日子已經好耐冇睇波,有感而發。

假如你仲有心情睇波的,我唔係怪責,亦冇必要怪責。睇波唔代表冇出心出力,可能佢已經撐咗好耐,真係需要唞一唞,我會為你高興同支持你;

假如你冇哂心情睇波,我唔會強迫你去休息,因為你有自己嘅諗法,我冇必要阻止你,唯有希望你可以撐住,第日有機會,我哋一齊去酒吧飲下嘢,吹下波經,睇下直播,共渡一個沒有現實紛爭嘅美好晚上。

 

(標題為編輯所擬)

作者 Facebook

發表意見