立場新聞 Stand News

天怒人怨坐的士

2015/7/8 — 11:07

的士業界大力宣傳,你今日download咗未?

的士業界大力宣傳,你今日download咗未?

話說,的士商會車主反對Uber與各種召車App搶生意,謂司機「天怒人怨」,威脅堵路;的士業界早前還找過理工大學放蛇做研究,似乎要令自己的訴求有點學術根據,不過,捉蟲了。

呢份研究值得一睇,這個理大科技及顧問有限公司,看來沒有受委託方的立場影響,持平客觀中立公正,報告詳細列出香港各種召車App的優勢(見此,聲明後之報告第三頁)。

廣告

讀完這份研究,才知自己孤陋寡聞,原來香港的電召App公司,提供多元化優質服務,亮點如下,我好想試吓︰

**收費簡單易明
**GPS顯示電召車的即時位置,乘客有預算,減低等候的焦慮
**調配車輛得宜,減少等候時間
**可透過APP即時發放優惠訊息
**司機知悉起點終點,拒載機會較低
**Uber還會認真處理顧客投訴,甚至懲罰司機,乘客很受落

廣告

業界抗議造成反效果,才知道原來很多香港人坐的士,坐得天怒人怨,本人最近遭遇︰

有一天,樂富的士站排隊等車,看見一位外籍青年,剛打完波,截了幾架車,司機都扮作不懂英文,拒載;輪到我上車,問司機,做乜唔載,司機話,佢去Stanley,赤柱咁遠,又無回程客,仲話「鬼仔成日唔畀錢」,然後,數落內地自由行客,尖沙咀去尖沙咀都要坐車!

長程嫌長,短程又嫌短。我坐的士,已少坐短途,費事見到司機鞋口鞋面,但最近也碰過這些︰

一位阿伯司機,手震腳震,的士直路飄移,應該係柏金遜症。

一位中年壯漢司機,喜歡無啦啦踩油,剎掣,踩油,又剎掣,轉彎,大動作搶軚,坐完一程大埔道,落車,耳水不能平伏,想嘔。

司機有病,或駕駛技術差,不知如何開口,只好扣緊安全帶,提高警覺,保住小命。

又有一次,拿著一個空置的小小行李喼上車,無開車尾箱,到埗,司機話要收行李費,我話咁細,一向唔使收,佢話要收,仲串串貢話,可以攞單據投訴,我畀佢大一大,當時天黑,趕時間,於是畀了行李費,攞了收據準備投訴;後上網查,才肯定上得飛機的手提行李size的行李喼,不須付額外行李費,想投訴,但原來需要司機姓名,單據上無,我死蠢,下次要投訴,記住影低司機名牌。

當然,尚有很多正常的司機,冷漠得來,收錢時都會講聲多謝,開進無名無街燈山路都肯去,有時都有傾有講。好多司機話,近一年油價大跌,一更都搵多咗,無乜太大怨言。反而係召車App影響的士牌價,車主車行不高興。

這些車主車行,手握的士牌照,炒到六百幾萬一個;但是,的士服務,這些年來,從不見改善,無八達通,無高科技,座位繼續凹陷,坐得腰骨痛,只給你椅背裝一架嘈吵電視,播無謂透頂的節目,連一刻的安寧都唔放過,坐車也不能耳根清靜,次次請司機閂電視,總謂「閂唔到」,自己閂,但篤極熒幕都無反應,再問司機點樣令電視廣告收聲,答案總係「唔知喎」。折磨乘客,廣告費當然係車主車行收。

電台聽眾,談到的士服務,又係天怒人怨,有位先生謂,點解的士牌可以轉讓可以炒?為何不發多些牌,為何不直接發牌給司機,規定不能轉讓?

有位女士話,阿媽坐輪椅街上截的士,常受歧視,司機嫌麻煩,當面單單打打。阿女士話,的士司機要罷駛堵路?好啊,我叫成排輪椅出來一齊同你塞住條路!

的士堵路?一定嚇窒政府,八四年的士罷駛導致旺角騷亂。今天,若的士行業帶頭佔領旺角金鐘,一定很多人響應,堵吧。
 

 

原刊於作者博客

發表意見