立場新聞 Stand News

天馬苑山下有墟 街坊為街坊開檔

2018/2/16 — 0:32

天馬苑商場兩度易主,自財團入手,大肆翻新,十室五空,前後滄桑,了無舊痕。

一眾街坊寧自立門戶,也不甘坐困。

廣告

* * *

廣告

Clevis

從事手作的 Clevis 曾住隔鄰天宏苑,「有冇生意都嚟撐吓場。」

「而家商場收哂啲舖,乜都冇。依度唔同出面墟市,唔為賺錢而擺檔,大家都係有心人。」

* * *

郭女士

郭女士放售家中藏書,並偕家人教小孩剪紙。

「我喺依度大架。」旁邊小朋友忍不住插嘴:「我都係呀!」

「有機會咪同街坊分享吓囉。大佬畀條生路行吓,郁啲就要去竹園同樂富商場。唔好唔記得我地就好啫,老人家就好大鑊。(財團)冇為依度嘅人設想。」

「既然有街坊搞墟市,我知佢地好辛苦,所以要支持佢地。」

* * *

「不.足 bat1zuk1」

擺賣手繪的她們都住在天馬苑,「今日落嚟就得喇。」

「成日幫襯麵包家,搬走左唔方便。得番百佳同 7-11,冇嘢可以揀。」

「我地好鍾意擺市集,想多啲人推廣墟市文化。其實外國嘅 Sunday Market 好普遍,但香港嘅地方比較少。有多啲人肯擺,就會愈多人留意到墟市存在。」

* * *

「美女野獸雜貨店」

一家人原來為了街坊,才臨時開張首次擺檔,但邊度嚟咁多貨?

劉小姐解釋:「因為我好鍾意夾公仔,去完日本就會有一大堆嘢拎返嚟。」

劉媽媽則說:「(商場)唔應該賣畀私人集團,好似賣豬仔咁囉。」

* * *

胡先生

劉先生特地自朋友的玩具店借貨,也要為街坊撐場。「而家成個商場好似廢墟咁。政府將個波交俾人。」

* * *

梁先生

墟內兼有攤檔負責揮春字畫。只要一個屋邨的人願意出來,各行各業臥虎藏龍,一個墟市已經不假外求。

負責畫畫的梁先生說:「如果剩係自己一個畫好自閉,咁樣可以同人溝通。估唔到咁凍都咁多人。」

* * *

麵包家

麵包家一家特地回天馬苑回饋街坊,大排長龍,麵包火速售罄。

* * *

團購

業主立案法團推出團購,既免別無選擇,亦免舟車之苦,讓居民繼續買到必需品。

* * *

Gloria

「一出世就住喺度。」Gloria 是天馬苑居民,也是「山下有墟」的搞手之一。

「一來商場冇乜舖頭;希望大家落樓下就買到有用嘅嘢;二來冇乜活動,鄰舍關係比較疏遠。想搞啲活動促進鄰里關係。」

* * *

「薑寶仔」

因緣際會,筆者終於買到名聞遐邇的「小強暴走磚」。

筆者的家絕對是最佳試驗場,為測試效果,來日會交代小強數目報告。

* * *

後記

回思採訪天馬苑,一眾街坊曾會聚商場,商量怎樣自救。

當大家討論自發墟市,筆者忍不住插口--其實是潑冷水--說天馬苑位置畢竟稍遠,持之以恆不容易,踐行前宜三思。

結果人數超乎想像,證明筆者又柒了。

事後自省,民主運動或多或少要一點「鈍感」:一旦下定決心,就不可太理會別人。

外人一定會見風使舵;敵人一定會嘲笑,這些都是必然的。行動者固然要廣納諫言,但又不能隨眾動搖,怎樣拿捏殊不容易。

民主的路上,需要更多行動者坐言起行;更少跟風者(即是筆者。。。)撥冷水、出屎橋。筆者永遠只堪當烏合之眾,缺乏勇氣勝任行動。

一句舊諺永遠是至理名言:「在決策時考慮一切;在行動時十分果敢,就是最有智慧的人。」

山下有墟一眾義工就是楷模。

發表意見