立場新聞 Stand News

失落的會安古城,失落的香港

2017/5/29 — 15:18

【文:詞窮】

會安

1999年會安古城被列為「世界遺產」,佢以前係東南亞重要既貿易港口,十六世紀果時係「海上銀絲之路」既一站,有中國、日本、歐洲等地既船隻停泊。清兵入關時有一批明朝遺民黎左越南落地生根,所以係會安古城可以見到華人會館、關帝廟、廟宇等古蹟。不過其後會安既港口因為越黎越多淤泥,導致河床變淺、河道變窄,逐漸唔適合大型船隻停泊,所以最後會安作為貿易港既地位就比峴港取代左。

廣告

越南近年大力發展旅遊業,會安作為世界遺產,吸引大量外地旅客參觀。加上會安隔離有東方夏威夷之稱既峴港,佢因爲有超長既海岸線吸引眾多遊客前往渡假。由於峴港唔單止有機場,佢既旅遊配套亦相對發展成熟,交通方便,所以遊客通常去峴港時都會去埋會安、順化。

古蹟猶舊,人心不古

廣告

會安古城係一個好靚既地方,小橋流水,古牆斑駁,燈籠高掛,朝早既古城極為寧靜,而夜晚時既古城火紅燈綠、極為熱鬧,唔同時段去都有唔同既感覺。

古城雖美,但筆者遊覽古城既時候,總覺得會安古城就好似一座蠟像,一個個燈籠似係佢空洞既眼神,唔具有靈魂。

最主要既原因,係會安古城雖然保留左古時既部分建築,但佢無保留到古蹟既歷史意蘊同文化內涵。古城入面大多數既古屋都被改建成為餐廳、商店,而其他古蹟例如來遠橋、貿易碼頭、廟宇等等,都只能用一個「走馬看花」既方式去觀賞。各古蹟入面甚少文字既描述,遊客往往無從深入了解各個古蹟既歷史同作用,就算有導遊講解,除導遊講解得簡陋之餘,遊客都無心聆聽,古蹟只係一個比人影相打卡既地方。係熙來攘往既人群中,你唔會從古蹟之中,感受到佢既歷史意義同文化既重量,佢只不過係一座蠟像。

有道是,人係最美麗既風景,但當地越南人比我既印象一啲都唔好。當地人一有機會就會敲旅客一筆,購物、交通等等方面,越南人見係旅客就會抬高價錢。此外,由於筆者半年前去左緬甸,相比緬甸人同埋越南人對待旅客既態度,兩者反差甚大。大多緬甸人見到旅客都會面露笑容,反映其民風之純樸;但部分越南人見到旅客就好似見到獵物咁,如果你唔光顧,佢地有部分人就黑口黑面,唯有一啲比較出名既店鋪,待客態度先會好小小。

對於當地人而言,會安古城似係一個賺錢既工具,多過佢係一個古蹟。古城之內充斥著一式一樣既店鋪,會安古城充其量就係以古蹟作包裝既市場,懷古之意,從何談起?再者,如果你細心觀察,古城入面旅客罕至既角落都會堆積住建築廢料、垃圾,污染河流。又係筆者同當地人既交流之中,睇唔到當地人對古城文化內涵既熱愛同尊重,甚至有部分人根本唔清楚古城既歷史。

古蹟好靚,但當地既人已經唔再純樸。古蹟作為文化既結晶,象徵住當地人既根源,如果當地人唔重視古蹟既文化內涵,咁古蹟只會變成一個空殼。倘若有一日會安古城唔再有遊客光顧,咁呢個地方對於當地人而言仲有意義嗎?

失落的會安古城,失落的香港

當初峴港取代左會安成為港口,得以發展成都市。如果比當時既會安居民揀,可以既話佢地係咪都會想放棄古城、走上峴港既路?我相信會。

會安古城係越南人發展旅遊業、進而發展經濟既工具之一。2016年越南接待國際遊客數目達到1000萬人次,旅遊業收入高達200億美元,已超過越南政府總理所頒布《2020年前越南旅游發展戰略及2030年展望》入面各項既定目標。但旅遊發展似乎同古蹟文化保育互相矛盾,正如會安古城因為吸納大多遊客,同時吸引大量商鋪進駐,再加上文化保育不善,最終令古蹟失去味道。又如意大利威尼斯因為旅客太多,所以係幾年前曾經向聯合國教科文組織申請退出世界遺產名錄,以保護呢份人類遺產,但這項請求未果。不過外國亦都有唔少發展旅遊業同時又可以保育文化既例子,就好似參觀京都著名既桂離宮必須預約,10人一組,先觀看45分鐘既映像介紹,再由專業導游帶領游覽,有條不紊,院落寧謐整潔,保留庭園既靜美。同樣,歐洲古堡游覽亦都會限制人數同時間,盡量係旅遊同保育之間達至平衡。

一個城市既特色、氣質同靈魂,係由歷史砌建而成,如果當地人完全抽空歷史既痕跡,同時亦都抽空左城市既靈魂。點解羅馬、希臘、埃及⋯⋯咁吸引人?就係因為當中歷史文化既重量 —— 遊人去到當地可以將眼前見到既古蹟,結合當地歷史文化,一虛一實,相輔相成,以深刻地感受當地既內涵、從而對當地著迷。

係越南不斷發展既同時,文化卻不斷比當地人換取為利潤,而人心亦因為圖利而變得骯髒,同樣既情況,係世界上又點止越南?

如果比我揀,我寧願賺少啲錢,維持到三餐、有瓦遮頭,得閒可以去下郊野公園,同鄰里有談有笑,咁樣已經好足夠。或者我咁樣諗係太過天真,或者當我係越南人既時候,都會拋棄文化拋棄環境,去賺取更多既金錢獲得更好既生活,但一輪輪既交換過後,越南已經返唔到轉頭。而我地香港更可笑,我地從來都唔係交換,我地有一班賣港賊將香港奉上比北京,任由殖民者賤踏我地既歷史、文化、土地、郊野⋯⋯;越南人係扼榨外地人,但香港人就係扼榨香港人。我地香港,亦都返唔到去以前充滿人情味既橫街窄巷,只剩返愛國、貪污、豆腐渣。

得到所謂既發展,但我地失去記憶又失去靈魂既時候,我地仲剩返咩野呢?


作者Facebook
 

 

 

 

 

發表意見