立場新聞 Stand News

「學好普通話」同「以普通話為主」係兩回事

2018/10/9 — 17:55

補充多些少吧。

上海係一個我成日都去嘅城市。大部份上海人都識講上海話,但上海係一個以咩語言為主嘅城市呢?我諗冇人會否認係普通話吧。

好多人,有意也好無意也好,會混淆「學好普通話」,同「以普通話為主」嘅分別。前者,係講一個人學多一種語言技能,我百份之二百贊成。能夠懂得多一種語言去溝通,肯定係好事。而後者,係講緊將一個人、又或者將一個地方改變成另一種語言為主嘅方向。呢個方向,牽涉嘅係教育政策、人口政策,與及官方對不同語言嘅地位嘅態度問題。呢一個,亦正係會影響香港人搵食能力嘅關鍵。

廣告

講後者嘅時候,往往會有朋友會用前者嚟駁斥。然而明嘅就明,講到咁都唔明,唉,不如試吓用普通話讀出,會唔會明多啲?

若干年之後,香港仲會唔會係一個粵語為主嘅環境?所謂優勢,講得再白一啲,並唔係要所有人都「唔識」普通話;最理想嘅狀況,應該係:呢個城市即使人人都識聽識講普通話,但呢度依然能夠保持係一個粵語為主嘅城市。呢樣嘢,政府肯定唔會幫你,而要靠本地人自己齊心守護。

廣告

我也懂英文,也勉強算是流利吧。然而在外國工作嘅時候,當然英文係主導語言。我在別人嘅地方工作,用英文溝通,能力自問打個八折,相對有利嘅,當然係以英文為母語嘅 local 人。嘗試將呢個情況擺喺香港諗吓,應該會明白我講緊乜吧。

又,你一定又會講,香港人,講英文都遷就咗班鬼佬好多年啦,點解依家唔可以用同樣標準遷就講普通話嘅人?首先呢,過往香港人吓吓遷就鬼佬,其實我覺得同樣係過份咗的。以前有好多家長會有意無意令到自己啲細路開口只懂英文,甚至以唔識講中文為榮,我覺得都係愚不可及。不過,鬼佬雖然惡,但數量點計都唔算多,從前香港人即使幾咁虛榮都好,要令呢個城市變成「英文為主」嘅地方,始終係難過登天。現在嘛,每日不斷輸入以普通話為主嘅人口,加上教育政策配合,假以時日,香港被改變成普通話為主,粵語為副嘅城市,相信並唔係天方夜譚。實情係,已經有唔少跡象顯示,我地正朝住呢個方向走。咁,有冇錯呢?都係嗰句,語言嘅嘢,冇話對與錯嘅。只係你要諗吓,當語言環境真係改變成咁嗰陣,你作為一個土生土長嘅香港人,搵食到底係難咗定易咗?係咪只要你都操得一口流利嘅煲冬瓜,就代表你喺呢個城市搵食,會有現在(或者以前吧…)所擁有嘅 advantage?

嗱,講多一次:講緊嘅,唔係政治,係搵食呀。

 

(原文無題,題為編緝所擬)

作者facebook

發表意見