立場新聞 Stand News

學校料打風放假 派定明日功課共17份 家長歎:俾小朋友抖吓都唔得

2016/10/20 — 21:22

天文台已發出3號強風信號,並會在明早考慮改發八號烈風或暴風信號,小朋友或有機會放「打風假」。不過有家長反映部分學校已經「做足準備」,今日上課時已一併安排明日功課,兩日功課合共17項。有家長慨歎:「打風俾小朋友抖吓都唔得」。

在「不願小朋友成為功課奴隸」的facebook群組內,不少家長都透露,孩子已獲預先安排明日家課。有家長揶揄:「呀老師,一睇就知你係因為太愛學生,絕對同課程趕到俾少日都做唔切無關啦,一定係想佢哋連打風都記得你先咁做。」

另一名家長就稱,「我地學校就非常之貼心咁,交代埋明天嘅功課,總共有17樣。」有多名家長均稱,就連幼稚園都有相同安排:「有呀, 幼稚園生都有」、「K2,中、英文寫字、數學練習、閱讀報告、英文生字簿,5樣(功課)」。

廣告

不少網民均留言回應稱,自己的孩子亦遇到相同情況:「傻的嗎?連打風假都唔放過……」、「我都覺得好黐線,病假又要返去攞功課,而家連風假都比定功課」、「根本唔會放過啲小朋友」。

廣告

發表意見