立場新聞 Stand News

安心上路滿足晒男女陰暗面

2019/4/19 — 14:34

許志安,圖片來源:rthk片段截圖

許志安,圖片來源:rthk片段截圖

點解「安心上路」全城熱爆?或者正如好多人問,點解香港發生咁多嘢,都冇人關注,但係凡有呢啲咁嘅明星偷食事件,就全城起哄呢?

好多人話,因為「睇人仆街最開心」。唔通真係咁簡單?梗係唔係。好似林鄭政府係都要修訂《逃犯條例》,全香港邊個會「仆街」?係人都知嗰個叫大劉,如果睇人仆街最開心,我又唔見好多人跟住起哄喎,啲香港人好似覺得大劉仆街真係冇乜好睇,對修訂條例冇乜反應,同「安心上路」完全冇得比。

但凡係明星偷食,總能引起全城哄動?係咪香港人特別賤?其實好多人都講,喺外國都成日有呢啲新聞,一樣好多人關注。

廣告

除咗事主影響力大多人識,可以滿足做判官反虛偽嘅心態(又好正常,邊個判官冇快感?邊個人鍾意虛偽嘅人?),歸根究柢,其實都係一場男女之戰。呢類事件,能滿足晒人性嘅陰暗面,但同時又可以令自己高高在上,咁點會唔爆先?

先講男人,面對呢啲醜聞,最主要嘅情緒,除咗好色,還有羡慕甚至妒忌。首先,睇呢啲片,當然係滿足自己嘅性幻想。好似呢件事咁,男主角已經五十開外兼且幾唔靚仔,竟然有一個青春少艾(至少外貌不似三十)兼身材惹火嘅「純情玉女」,意態撩人,主動送吻,仲要搭緊的士都已經慾火焚身,呢啲咁嘅情節,咳咳……,九成成年男人都知道,係屬於日本製造愛情動作片嘅。本來呢啲情節就係要補償現實嘅不足——即係喺現實根本冇乜可能發生——但依家話你聽係真架,係真架,本來屬於幻想嘅原來變得可能,用個適合知識份子嘅例子講,即係本來大家都知,中共無端端會作政治改革而行民主制,其實只係幻想,依家突然話畀你聽原來真係會發生架喎,梗係high爆啦。

廣告

呢兩日,我聽得最多來自男人嘅評語,就係「估唔到心穎咁開放(原句係難聽好多嘅)」,佢哋一路講,一路笑笑口,係男人都心裏有數講緊乜。所以,大部分男人花生呢件事,好多時係出於對安仔嘅羡慕,唔鍾意安仔嘅,可能係出於妒忌或同情偶像Sammi。但,我就好少聽到有男人嬲呀心穎。

但更重要係,大家唔好忘記,事件有一個最大嘅受害人,就係安仔老婆。透過對妹妹仔嘅性幻想,以及對事件自high,其實就係對老婆嘅報復——因為平時要壓抑,有咩不滿有咩怨忿都不能或沒有宣之於口,所以透過討論事件來滿足這種報復心理。

嘩,你條粉皮講嘢有冇咁誇張?喺度亂吹廿四。嗱,你去買套經典電影《American Beauty》(美麗有罪),睇完,你即刻明晒我講乜嘢(睇許鞍華嘅《男人四十》也勉強可以)。更現實嘅例子係,早排我睇到一個恩師嘅訪問,佢話有一次同太太上一啲相處嘅課程,導師要佢哋各自講吓對方係點,佢講咗十分鐘,佢太太簡直唔相信眼前嘅人係佢老公,唔講以為佢鬼上身,但因為咁,先有機會重拾關係。

如果有一個男人,因為呢件事好憎許志安,而佢唔係同性戀唔係壓抑扮嘢(好似《美麗有罪》個鄰居咁)又唔係單身冇拍過拖,佢真係一個好男人,而且應該有段美好的婚姻。

男人真係好賤呀!冇錯,所以女人點解都咁關注呢啲偷食事件,其實都係男人引發,而且情緒更為複雜。簡單啲講,「安心上路」滿足咗女人三種情緒:痛恨男人、妒忌女生和同情女人。

呢件事引發最多嘅女人評語有三個:(1) 男人都係賤格嘅;(2) 心穎呢啲死姣精正一XX;(3) Sammi真係好慘。

都唔使再解釋喇係咪?狂鬧心穎嘅(老實講我就聽唔到男人鬧心穎咁滯),當然出於妒忌和對競爭對手的恐懼——老嘅怕嫩嘅,嫩嘅怕靚嘅,靚嘅怕姣嘅。狂鬧安仔嘅,又唔使講,男人係賤格架嘛,仲唔乘機鬧晒天下嘅男人兼炳埋身邊嗰個咩。咁同情Sammi嘅,自然係同病相憐感同身受。咁你話,呢個世界有咩新聞,可以同時滿足女人嘅三個「願望」?

又有咩新聞,可以同時滿足男男女女嘅情緒缺憾,各取所需呢?

一切,其實都係上帝跟人類開嘅玩笑——男人去到五十以上仲可以出軌生仔,好似郭富城咁,五十歲人先結婚做老豆。女人呢?過咗五十,出軌機會還是要比港鐵細,而且還越來越細。這個最大嘅差異,形成咗兩性無可緩衝嘅衝突。女權份子會說,女人真可憐——查實我都覺,但另一個角度睇,男人都幾可憐啊,總係畀人話用下面諗嘢,看似能自主,卻是難以自主。試諗吓,心穎BB喺你面前變身蜘蛛精,真係唐僧都難以坐懷不亂,何況凡夫俗子呢!男人往往就咁身敗名裂,被全世界女人臭罵,都慘㗎。(而身為男人,肯定寫完呢篇都會畀人臭罵,哈哈)

這種男女之戰總係沒完沒了,除非人類充當上帝,基因改造,補救男女在性事上的分野,或者,戰火才會熄滅。

P.S. 上一篇,有些人追問「睇人仆街啱唔啱」、「八卦人哋嘅事啱唔啱」等等嘅問題,呢啲問題,就好似追問我:「睇AV啱唔啱?」「女人貪慕虛榮啱唔啱?」「講大話啱唔啱?」「偷懶啱唔啱?」如果要公開答你,咁我梗係話:梗係好L唔啱啦,仲使問。

 

作者 Facebook

發表意見