立場新聞 Stand News

宏利的小學雞拆彈

2015/6/4 — 22:33

網傳宏利員工出資數百元找製作人拍片的訊息截圖

網傳宏利員工出資數百元找製作人拍片的訊息截圖

今期FB真係好熱鬧,計Snickers既Same on you狂洗版之後,又有宏利$500拍港產科幻寫實動作片,仲要有班醒字派品牌,第一時間狂抽水,幸福、大新、嘉士伯、大嘥鬼,人人有份自製抽水器,實行一齊抽乾太平洋。

講真,成件事,簡直係一首令人聞者心酸的輓歌。首先,聽講始作俑者係宏利Unit Manager,要自己掏荷包俾錢拍片,已經好慘豬。仲要宏利堂堂一個國際大品牌,仍然沿用小學雞式拆彈方法,就更加笨豬。

自網友揭發$500拍片事件,短短幾小時,火勢已經快速蔓延至太空,宏利公關部的拆招方法,是傳統式的官腔denial: 嗱,唔關我哋事呀,我哋無請人拍片呀,立即同個Post劃清界線。呢D傳統式回應,在未有《蘋果動新聞》、《立場》同《100毛》既年代,可能都仲work; 如今,在網上核爆式被人勁loop既年代,呢一種回應方法,已經好out。

廣告

正所謂「係邊度跌倒,就係邊度企番起身」。宏利衰係網友手上,就好應該想盡辦法,係網上為自己贏回樽鹽; 況且,他們又無咩做錯,既然網友們玩得咁開心,他們應該自己都拍番條一分鐘《星際啟示錄》、《他來自地球》,以自嘲式的幽默回敬網民,大家一齊熱鬧下,幾好!

又或者,他們第一時間搵《毛記電視》幫忙,請來「臨時特約一次性執行董事」陳志雲,做多一次「一次性執行董事」,為宏利開個特別新聞記者會,以毛孩的語言,向廣大網友澄清一下事件,自然可以還我清白,執番身彩,分分鐘仲可以成功游說班毛孩幫公司買番份保單。

廣告

呢件事,令我想起之前Puma既D7689號碼布事件,本來一件唔關Puma既事,他們又係用最傳統的方法回應致歉,又係咁,一個好品牌就蒙上污點。千錯萬錯,錯就錯在手執話事權的老闆們,實在太唔明白Social Media是一場什麼遊戲,當他們年紀已經有番咁上下,分分鐘連Facebook都無Account既時候,又點會識得在網上同高質網民交手?

真心希望各大品牌,要學下點樣在Marketing 4.0年代做好公關,如果唔係,在不久將來,又會多一個品牌係網上遭網友圍剿至陣亡,Rest in “piece”!

 

 

發表意見