立場新聞 Stand News

將男女互動教條化 非常無聊

2017/4/25 — 17:04

圖由作者提供

圖由作者提供

其實男女關係係非常之複雜而又不停有互動關係㗎。你唔係逐個情況拎出嚟討論,單架空講「第一次出街邊個請」係無意義㗎,由此扣去咩兩性平等,更加係搖頭晃腦嘅左翼范進先會做嘅事。

例如你第一次食飯,個男仔好靚仔,真係超靚仔,又大隻,又大波,乜乜物物,總之你好嗒糖,然後你又搵多錢過佢,甚至出街前係借啲意話「唔,多謝你上次幫我乜乜乜」之類嘅,咁唔通真係男仔請?

但如果唔係嘅,例如係有個男仔(我唔知你哋點識啦)借頭借路──你自己判斷到有幾借頭借路㗎嘛──約你出街,然後你又肯出街(已經係個 signal 啦),然後出到嚟佢又扮到好有禮貌好有風度,令你認為佢想追你嘅,咁你預佢會請都好正常㗎喎。而可能呢個時候你唔知佢係做乜,可能佢係讀啲「搵唔到錢」嘅科(例如中文系),但唔關事格,喺呢啲情況多數都係佢請你㗎噃。

廣告

咁講真,對女人嚟講,天性想搵一個比較「生活條件好」嘅男人,的確係幾普遍嘅事,而好公平地,男人想搵一個生得靚嘅女人,又係幾天性嘅東西。但如果有啲情況,個女人好想搵個靚仔,咁佢不惜工本都要約到個靚仔(加埋大波啦,好啦),咁個女人去約會借頭借路畀錢都唔出奇㗎喎。而又當然,如果個女人好有錢嘅,佢又會擔心:吖如果我畀晒錢會唔會好似「嫖」佢咁,佢會唔開心?男人自尊乜乜物物㗎嘛,咁。咁你又要睇返個男人咩情況年紀性格㗎喎。所以一切都是流動的,無定例㗎。

但又例如有啲情況可能係大家都成年人,過晒果啲「high flyer」嘅年紀,可能佢無乜讀書但開間舖頭有啲錢,你又做到大公司中層唔算好叻但人工又幾好,大家擺明係想搵個約會對象出嚟食餐飯嘅,真係,個女人主動拎一部份錢出嚟,(例如$500 out of $2200),係幾得體㗎喎,顯示咗會肯一齊出錢付出,唔係單單「你來溝老娘」,又畀足面個男人,其實係無問題㗎。

廣告

喺實際情況下,男女雙方嘅本身見識,性格,外觀,幾乎成個人嘅所有原素,都會影響每一次約會嘅每一次溝通同互動,然後大家慢慢會搵到一個平衡點出嚟,再去到拍拖,甚至其餘乜乜物物。將呢啲互動教條化,變成「總之要男人請」「總之女人應該AA」,係完全無理會過中間好多細微而有趣嘅互動,成件事變得好無聊。假如更有甚者用啲咩咩咩學說去包裝,就更加係老撚土了。

 

(標題為編輯所擬;原刊於作者 facebook

發表意見