立場新聞 Stand News

對於伯伯嚟講 農地絕對唔單止係一個家 而係一世人嘅心血

2016/4/28 — 21:07

圖由作者提供

圖由作者提供

【文:新青年理髮廳】

《區區小事》#0

老豆係幾年前認識呢位以耕種維生嘅伯伯,由於呢位伯伯係獨居,住係農地旁邊嘅木屋,所以老豆每隔幾日就會探下佢,然後慢慢開始,佢哋之間就建立左一段友好嘅關係。

廣告

伯伯每日都會拎自己種嘅菜去街邊賣,幾十年嚟就係靠住少少嘅收入去維持生計,老豆特別欣賞伯伯果份默默耕耘嘅精神,所以同伯伯十分投契,我諗大概因為老豆都係靠著呢個性格去成長,去養大我地四兄弟姊妹。

我每一次去探伯伯,佢都會好熱情地問我要唔要菜,要唔要辣椒仔,要唔要木瓜,每次佢都會好自豪咁話我知佢種嘅菜係無落農藥,見到少少蟲蛀嘅洞係正常,所以要好用心機打理,出面係買唔到,老豆每次都會同我打個眼色暗示要接受伯伯嘅好意,佢話我賺了菜時,伯伯又賺了滿足感,何樂而不為,所以每次我都會卻之不恭收下。雖然伯伯又黑又瘦,而且臉上有好多皺紋,但總係經常流露住一份自滿。笑嘅時候,面上嘅皺紋好似話緊比我知伯伯同農地嘅關係有幾深。

廣告

好不幸地,一次大火將伯伯嘅農地連同木屋一次過摧毁,農地變成荒地,木屋變成廢墟,幾十年嚟嘅心血一日之內化為烏有。老豆本來建議伯伯申請搬上樓住,但伯伯話無左塊農地,已經唔想再生存落去,因為塊農地對於佢嚟講,係生命中唯一嘅寄託。老豆唔忍心見到伯伯咁樣,所以決定幫伯伯重新起過間木屋,鋪過電,搭過水,幸好上天賜予老豆有呢個能力。最後用左三個月時間,伯伯終於可以回復返以往耕種嘅生活,每日如常地起床打理農作物,傍晚賣菜,夜晚回家煮飯,上床休息,每日如是。

可能係好多人眼中,農地對於農民嚟講,只係一塊耕種嘅地方,又或者只係一個家。但對於伯伯嚟講,農地絕對唔單止係一個家,而係佢一世人嘅心血,係佢生活嘅大部分,用幾多錢都不能夠交換。老套啲講句,農地就係伯伯嘅生命。

如果你唔明白,可能因為你從來未真真正正去愛過一樣嘢。

 

 

標題為編輯所擬;原刊於新青年理髮廳 facebook

發表意見