立場新聞 Stand News

就連公屋都氣數已盡

2018/12/22 — 18:44

資料圖片:啟德公屋單位德朗邨

資料圖片:啟德公屋單位德朗邨

新出長遠房屋策略報告,可以睇到政府力推賣公屋最大嘅政策悖論,在於話幫普通市民買到樓嘅迷思。講到「綠置居」市價42折好似好so益街坊,但係對合符申請公屋資格嘅人嚟講,要佢成200-300萬拎20-30年供間公屋根本係unaffordable,除非俾佢拎出黎轉讓再炒,但一俾佢炒就引大班炒家入場借名炒綠置居,你會見到排哂隊抽籤買,但最尾真係幫到普通市民既機會係好低。

然後你話公屋有好多富戶唔係基層,其實佢地買得起,咁做乜我地嘅公屋政策唔收佢貴啲租,而係要拎公帑補貼佢買? 咁你係幫到買得起樓嘅人而唔係普通買唔起樓嘅市民解決居住問題。

「綠置居」明明就係幾百萬先買到嘅公屋質素私樓,政府依家就偏要定義佢做要買先有嘅「公屋」,即係話,以後政府一間廉租公屋都唔起,全部公屋都要幾百萬先買到。刻意混淆定義嘅後果,就係政府以後會成日話自己已經起好左多「公屋」,間接係將租住公屋嘅供應封頂,最後反令普通市民要額外花更大嘅成本在居住問題之上,而你又咬佢唔入。

廣告

同埋當呢個賣公屋政策恆常化,可以預視以後市區包保再見唔到窮人,例如長沙灣新起嘅公屋政府都會傾向轉成為賣,即係以後窮人唔該住去天水圍,住唔起就住番大灣區,市區空間嘅階級化將會全速展開,未來嘅市區舊公屋重建起番預計都會朝呢個方向進發。

有綠置,冇窮人,解決普通市民居住問題最快捷嘅辦法,就係令佢地在面前消失。「綠置居」包裝到好似好受歡迎,好多人去當抽獎咁抽籤排隊,但本質上同林鄭公屋封頂、在香港實行低端人口管理嘅政策無分別。

廣告

租住公屋過去作為社會保障嘅根本,經濟十年八年一次好壞,市民唔會死得係因為至少有瓦遮頭,今天終於俾呢個地產利益主導嘅政府消滅。其實見到班王于漸、團結香港基金、林鄭嘅思維,唔係估唔到有咁嘅一日,只不過係香港自67暴動後租住公屋正式恆常化量產化到今日零散化含糊化,「50年不變」對香港真係一個好可怕嘅幽靈,無處不在。

發表意見