立場新聞 Stand News

居屋破 1,000 萬之謎

2018/7/25 — 17:24

富榮花園,圖片來源:維基百科

富榮花園,圖片來源:維基百科

居屋已經再破 1,000 萬,大家應該覺得好神奇嘅係,點解一間公營房屋最後都可以炒到咁貴,其實唔係冇得解:

1. 公營房屋同私樓個市場啲樓嘅質素明顯差距太大,地產商起啲市區納米樓都要成 1,000 萬,同樣定到成千萬買到間 3 房 700 呎市區居屋分分鐘有埋海景,俾咁大嚿錢你會揀垃圾定正常嘢?

2. 舊時居屋一開始出台由有 10 年轉售限制,頭 5 年只可以原價賣番俾政府,過咗 10 年先可以補地價流出市場,其實係好好隔絕到自住嘅人同炒家。咁多年來一路開俾啲人炒賣,依家第 3 年就可以「白居二」,白表人士收入上限佔咗全港 75%,過 5 年就可以補地價,令居屋有價有市,炒到去 1,000 萬又有幾難?

廣告

3. 政府喺個過程其實名義上好似「幫人置業」,但係今次 1,000 萬嗰個居屋盤係透過補地價方式賣出嘅,即係話政府唔駛做任何嘢,就可以淨袋 300 幾萬。一年有成差唔多成千宗補地價居屋流失去私人市場,成大嚿錢億億聲又係去咗基本工程基金俾政府起大白象工程。你估政府又會唔會想將居屋留番俾真係有需要買居屋嘅人,定係炒家入場都唔介意?

託政府嘅房屋政策所致,其實依家個房屋市場已經相當扭曲,依家 52 折新居屋去到 $6000-$7000 呎,二手居屋今年我哋計過可以去到中位數 $8,300 呎,根本係土地資源分配失衡同冇分炒家用家所致。依家啲真心想買樓嘅人已經唔 mind 供 20 年樓自住,將居屋個轉讓限制 set 到 20 年先俾佢放出私人市場炒,20 年內只可以原價俾政府回購,其實係其中一個辦法隔走啲爭樓買嘅投資者。

廣告

 

#1000萬嘅房屋問題
#房屋研究

原刊於作者facebook

發表意見