立場新聞 Stand News

年輕人,你值幾多錢?

2018/11/19 — 18:18

網絡影片截圖

網絡影片截圖

好多公司嘅市值,以價格帳面比率(P/B ratio)計算,隨時十倍八倍。為什麼?因為這個 B 指 book value,只是會計制度下的帳面價,很多時不能反映市值。

股票投資者比較看重市比率(P/E ratio)。市盈率可以低至三幾倍,也可以高到幾十甚至過百倍。為什麼?因為這個 E 指 earnings,是公司最近期的盈利狀況。但一間公司的市值,並非看最近期的盈利,而是取決於市場對該公司在往後數十年盈利和派息狀況的預期。如果市場認為公司的盈利會快速增長,其市值以 P/E 表達就會很高。反之,如果市場認為公司一潭死水,盈利會倒退,那 P/E 便會跌到很低。

這些概念放在人身上如何演繹?退休人士如我應看 P/B,通常接近一;年輕人就要看 P/E,只要努力自我增值、儲蓄及投資,年輕人就可以做到高 P/E。

廣告

我已退休,有收息,無收入,所以計算我的市值相對簡單。假設我全副身家都投進股票,收到嘅股息剛好夠我生活,我嘅 E 就等於零,所以睇 P/E 無意思。要睇 P/B,樂觀假設股票組合能夠追和通脹,我嘅 P/B 會接近一。這是因為將來我上天堂或下地獄時,剩下來的股票組合追到通脹,其購買力會與股票組合今天的帳面值差不多。

年輕人未累積財富,以 B 量度未必及我,但不打緊,因為年輕人嘅市值係睇 P/E。要高市值,就要做到高 P/E 。如何做到?我認為答案是:努力尋找工作上的真愛!這是我親身體驗,受惠得很,所以就算畀你取笑,我都要分享。

廣告

當年做電腦 sales,非我所愛,想轉行,妄想透過高層朋友的關係入「百富勤」。當時 in 我那位仁兄,見我想走後門,好鬼㷫,問我點解要轉行。我懶醒講咗幾個電腦行業嘅困難,點知佢一嘢就 KO 我,佢話:「有挫折大 x 晒呀?呢度做仲 x 多挫折,到時你又戇 xyy 要轉行呀?你咁唔 x 受得挫折,就咪 y 嘥我時間,真係鍾意呢行嘅人,就算幾 x 多挫折,都無 x 諗過轉行,你條 x 樣有無 x 諗清楚㗎……」

由於粗口太多,我實在無法記住這位仁兄的大名,但我真心誠意多謝佢,因為係佢鬧醒我,令我努力尋找,終於搵到我工作所愛,就是風險管理,正如那位仁兄所講,無論遇到幾多挫折,我仍然是樂此不疲。就算現在唔做嘢,轉行玩嘢,興趣依然是推廣風險管理概念,希望宣傳其貼地應用範圍。

人生最首要嘅投資就是自己。正如我經驗分享所提,識投,梗係投「一生最愛」:尋找一樣你真正喜歡的專業,談戀愛般的去了解它,要日思夜想都樂此不疲,要有「強逼症」般的熱情,去了解它的每個細節。不能怕錯、怕醜、怕瘀、怕煩;心態上要做到「佢愛唔愛我都無問題,但我肯定係最愛佢」!只有這樣,才能做到:𥄫到前面就估到後面、知得少少就識做代表、聞到陣味就懂得躲避、緊閉雙目也能看通全局。如果未談過戀愛,就好難感受到我嘅意思,但請放心,可放膽先去戀一戀,暗戀單戀都 OK!

我有好多舊同事,花錢花時間考會計、財務分析、法律等資格,但這些卻幫不了他們升職跳槽。為什麼呢?因為他們並未真正「愛上」這些專業,空有知識,卻不懂應用。如果有位同事已獲取某專業資格,但工作上明明可以應用時,同事仍然戇居居唔出聲,要劃埋條腸咁問,佢先肯答,仲要係問一句答一句嗰隻。相反,另一位同事雖無專業資格,但興趣大,鍾意發問,又肯主動去查證。你係上司,你升邊個?簡單講,你想人覺得你勁,唔該先 show 啲熱誠和赤子之心,這才能讓人欣賞得到!

年輕人,請努力投資在自己身上。唔使急但最緊要快,去找你一生最愛嘅專業,並盡力儲蓄。儲到錢才有本錢投資,從風險管理角度看,年輕就是資本,承擔風險能力高,應該趁年輕放膽投資,因為無論輸贏,「實戰經驗」本身已經是一項很好的投資。如何開始實戰,下次再講。

 

原刊於貼地風管 Facebook 專頁

發表意見