立場新聞 Stand News

幸福原來有得學

2018/2/7 — 14:46

Michael @ flickr — Attribution-NonCommercial 2.0 Generic (CC BY-NC 2.0) l 資料圖片

Michael @ flickr — Attribution-NonCommercial 2.0 Generic (CC BY-NC 2.0) l 資料圖片

【文:寶妮】

近期有隻廣告話只要寫個幸福小故事,就可以換小店「幸福多拿」喺社區跨店消費。無聊gag大家都會袋定幾個傍身,拎嚟換錢駛其實唔難;但講到幸福兩個字,就似乎離香港人好遠:之前就有個國際調查話,香港人嘅「不快樂指數」全球排名第七,同伊朗、伊拉克等戰亂頻繁嘅國家同時打入頭十名。

做人唔快樂,又點會幸福。

廣告

香港人,你快樂嗎?大家幾多歲,是否早起晩睡,每日要飲幾罐汽水,呢啲問題就好鬼易答。但點先會令自己開心啲、快樂啲、繼而幸福啲,除咗升職加人工中六合彩呢啲完全物質享樂至上嘅答案,香港人就真係搲爆頭俾唔到答案自己。

喂,大家又有無聽過正向心理學先?

廣告

講起正向心理學,大家肯定以為對人有讚無彈,就已經做到專業嘅正向心理學家。Wrong!有呢種態度嘅人,就只係典型取悅人群嘅擦鞋仔—「我都係跟您學嘢啫!」。正向心理學其實係一門研究快樂嘅科學:分析人類點解會快樂,以及教大家如何變得更快樂。所以正向心理學唔只理論咁簡單,每個人都可以將佢應用係自己生活之中。

今日唔係上psycho堂,但都有堂出名嘅心理學課介紹俾大家。講起哈佛的一堂課,大部份人就只係記得哲學名星教授Michael Sandel,一講正義,二講錢買不到的東西。但除咗佢之外,查實仲有位性格巨星:Ben Shahar,專攻正向心理學。

呢科正向心理學,曾經成為哈佛中最多人選修嘅一科。究竟有咩咁吸引呢?當世人煩惱緊什麼是快樂嘅時候,佢寫嘅暢銷書《更快樂》裡面,提出幾項令人更快樂嘅秘訣,可以係日常生活中實踐,十分貼地。其中有三項幾有趣,想同大家分享下。

秘訣一,從認知 (cognition) 上著手,提升自己對快樂嘅意識。Ben Shahar 說,每日抽少少時間,思考生活上可以令自己感到一件幸福嘅事,小至芝麻綠豆嘅事都得,將件事寫出來,記錄低。培養左呢個習慣,喺認知層面上,會漸漸改變對生活嘅睇法同觀感,繼而提升個人對快樂嘅意識,從而令自己更容易感到幸福。

秘訣二,我地嘅正向思維都好重要。要幸福快樂,某程度上關乎個人想法。當有些事情我地無法控制,有人會將所有嘅失敗歸咎於自己身上,形成心理學上所說的「習得無助」(learned helplessness)。呢種無助感會令人變得消極,失去動力,得過且過,自暴自棄。要令自己更快樂,就要接受你只係人,假使世界原來不像你預期,仍懷著一顆謙卑,來面對不安的天氣。畀老細閙,都唔好將所有失敗都攬上自己身。

秘訣三,從生活角度令自己快樂。快樂要活在當下,唔可以過度沉溺過去。回想錯過嘅野,會犧牲呢一刻獲取快樂的機會。與其懷緬過去單純美好的小幸福,倒不如積極爭取自己未來嘅幸福吧。把握現在,搵出生活嘅樂趣同意義,學習新事物,勇敢去愛,先會得會幸福啊。

以上嘅例子告訴大家,幸福係可以透過改變自己心態而實現嘅,所以第一步就係唔好再話自己係毒男宅女廢叔叔喇。幸福係無終點嘅,大家記得要喺追求幸福嘅大直路上面,繼續向前怒奔走啊。

 

作者個人簡介:熱愛研究心理學及藝術。細味生活,享受生命。希望透過文字和大家分享點滴。

發表意見