立場新聞 Stand News

廢青講廢青

2016/1/31 — 14:19

半年前,寫咗篇《我曾是廢青》,當時咁講:

「用今日成功人士的標準,我年青的時候,也是一名廢青。打機度日,諸多不滿,自以為是,不懂珍惜機遇,凡事得過且過,工作上受過不少教訓。這是年輕人的通病,也是成長必經階段,有權有勢有錢的高層,必須寬容年輕人三分,示範何謂胸襟識見,讓年輕人逐步上位,怎能失言失態,用年齡標籤聰明愚笨、上進懶散或正常失常。」

兩周前,《不成功便成仁》又提到:

廣告

「我由細到大,本質上只係廢青一個,唔鍾意計劃將來,無乜興趣登高遠望,習慣見步行步,隨機應變,呢種性格從來無變過,亦無諗過改。」

上星期,港台「我係乜乜乜」搵我呢個上一代廢青,講呢一代「廢青」現象,應該算係合適人選。講啲乜,自己去片聽清楚。

廣告

有無得罪人?清心直說,唔諗得咁多囉;

有無啟發人?老生常談,唔到我控制囉;

有無嘢補充,有。

你話人廢青,人哋話番你廢中廢老,無具體內容,純屬無意義嘅口舌之爭,一個有少少教養水平嘅人,點講出口。廟街阿叔,肉類分割員,發洩吓,OK無傷大雅;有頭有面有錢嘅高層,聲大大指責地位低微嘅年輕人,即係重量級拳手揼九十磅靚仔,有少少自尊,都驚畀人話大蝦細畀屎餵。

幾十歲人無修養,唔禮讓寬容年輕人,唔指點迷津,都算喇;明明同時代脫節,無本事管人,畀唔到人前景希望,挑唔起人責任心,激勵唔到人發奮,以為畀咗人工一萬蚊,就要人聽話任勞任怨抵得諗,又要人積極進取,開口埋口獅子山下精神,實情係又貪心又無徳行又無品。唔自我檢討,掉轉頭賴人無上進心,懶散唔捱得,仲青筋暴現,惡言相向,其實最廢係自己至真,醜字唔識寫,失禮死人。

任何時代,不分年齡性別,有人早開竅,有人遲開竅,有人永遠渾渾噩噩,頑石不點頭,唔係人人有事業心,嚮往名譽地位錢銀,識得為將來日諗夜諗。自己嘅人生,自己負全責,究竟有無意義,係咪快樂,唔關人事,無人可以高高在上,睇人唔起,話人係廢青,除咗自己。

幾日前,咁樣答網友:「下一代嘅人生係佢哋自己嘅,係咪努力上進,係佢哋嘅選擇自由,我好少過問,淨係關心佢哋有無禮貌、公德心同埋孝心。」三樣都有,老豆老母可以劏雞還神。

作者facebook專頁

發表意見