立場新聞 Stand News

張敬軒:叮噹!我好掛著你 你出翻嚟啦好嘛?

2015/1/2 — 17:28

「叮噹」配音員林保全逝世,網民紛引歌手張敬軒大熱作品《青春常駐》歌詞「叮噹可否不要老 伴我長高」悼念;張敬軒下午在instagram撰文悼全叔,形容自己是大雄,「叮噹!!我係大雄吖!!!我好掛著你,你出翻嚟啦好嘛?!! ...求下你......」

張敬軒形容,叮噹陪伴自己成長,「我完全唔乸知邊Q個係多拉A夢」;他又指自己近日獻唱《青春常駐》時,腦中均會浮現出林保全演繹叮噹的聲線。

張敬軒全文如下:

廣告

「你一直都係叮噹,而我宜家至知我係大雄

全叔,知道你走咗,我皺咗下眉頭,眼淚就係咁流落嚟。呢輪一味喺台上唱住『叮噹可否不要老......』,個腦入面就會出現你把聲,同埋叮噹個樣。我唔理,你根本就係叮噹!

喺我嘅年代,你就係叫叮噹,而我完全唔乸知邊Q個係多拉A夢!我唔鐘意人身攻擊,所以就算我成日俾技安烚,我都唔會因為技安生得肥而叫佢『胖虎』。......因為你,令我學會善良,同相信美好嘅人,同埋事。

由細到大,你都一直陪住我。每當我要考試溫書,我就會諗起「記憶方包」,想像如果有你喺度,你一定會俾『記憶方包』我,等我考試一百分;當我翻工、應啲我唔想嘅酬嘅時候,我就會諗起你嘅『石頭帽』,如果我有石頭帽就好喇,人哋就睇我唔到,令我可以留翻喺我哋嘅世界!當我掛住一啲以前嘅事同埋人嘅時候,我就會想像你會拎棟『隨意門』出嚟俾我......你知嘛?就係呢一次又一次嘅想像,令我一步一步行到宜家。

我從來都冇諗過,原來你會有一日翻咗入去個櫃桶,唔再出嚟...... 叮噹!!我係大雄吖!!!我好掛著你,你出翻嚟啦好嘛?!! ...求下你......」

廣告

發表意見