立場新聞 Stand News

得罪講句,寧願睇個伏伏地嘅大陸醫生,好過等排期等死

2016/6/29 — 21:06

支持政府改革醫委會方案的藝人張崇德(左) 與 高永文 (無綫新聞截圖)

支持政府改革醫委會方案的藝人張崇德(左) 與 高永文 (無綫新聞截圖)

【文:瑞典佬】

得罪講句,醫委會改革,係梁振英任內鮮有嘅德政。

今時今日香港醫療制度崩壞,公私營醫療嚴重失衡,公營人手短缺,排期輪後時間極長,醫護工時亦過長,頻頻出現醫療事故。私型佔整體醫護人手四成,但只有大概一成市民負擔得起(住院重症),收費過高。

廣告

種種問題歸根究底,係醫委會權力過大,防止引海外醫生入香港市場競爭,自己人保障自己人,醫醫相衛。

講到呢度,如果讀者唔明咩係醫委會改革,簡單啲講就係,政府將吸納張宇人提出嘅方案,提出加多4名委任議員入醫委會(即所謂4+0方案),令原本政府委任對業內互選舉嘅14:14,變為18:14。(醫委會主要負責決定醫生註冊,同埋一啲醫療事故嘅紀律聆訊,而醫管局就負責公營醫療嘅資源分配。)

廣告

咁班醫生就即刻衝出黎反對,主要論點就係醫委會會權力失衡、染紅、俾689操控、跟住大陸醫生落黎令醫療水平下降,仲恐嚇話上面啲醫生用灌腸醫冠心病信唔過。

事實係咩呢?

現時醫委會業界對非業界比例係24名業界對4名非業界,加多4名非業界,都只係24:8,即係得25%係非業界,莫講話操控,連一半都無。而比起英國嘅50%同加拿大、澳洲嘅33%,係非常低,業界仍然壟斷醫委會。

至於染紅一說,筆者絕對唔排除係梁振英嘅政治任務,條例一通過就真係可能俾大陸醫生落黎執業。但俾著你係一個癌症病人,你寧願睇個伏伏地嘅大陸醫生,定係想好似而家咁,等排期等兩年先有得睇?到時個瘤都已經大到變絕症啦!

以公私營全部醫生計算,2014年本港每1,000人有1.9名持牌醫生。比起發達國家如英國、新加坡和美國嘅3.7名(2013年)、3.0名(2014年)及3.3名(2013年),係差成倍。

解決人手短缺,最好嘅方法就梗係增加醫生嘅數量,做法有兩種,一係就就增加醫學生數量,一係就輸入外地醫生。

政府喺2016年就增加50個醫學學額,至470個,而預計呢批學生要2022年先畢業出黎做野,讀埋專科,最快要2028年,即係12年後,到時人口老化嚴重,更加供不應求。

培訓一個醫學生要三百萬,等最少6年,註冊一個海外醫生,係可以即時投入市場,仲可能已經有專科資格。但每年有百幾個海外學位醫生申請考試,三份卷加埋合格率大概得一成,每年得大約15個成功註冊。

筆者唔係認為,為咗增加醫生就可以無視醫療質素,但個問題係,要有能者居之。以法律專業為例,無論你係外國定香港法律學位,要成為執業律師,必須通過同一個專業考試,即係PCLL。如果醫委會決定以通過高難度考試作為海外醫生註冊嘅條件,咁港大中大嘅醫科畢業生,都應該須要通過同一個考試,以確保醫療質素,right?

筆者係一個濕疹長期病患者,以前經常要睇私家專科醫生(因為等公營就真係等死),每次睇兩分鐘就收我八舊水,醫生處方俾一罌用一陣就用完嘅類固醇藥膏。每次配藥,唔睇醫生,都收兩舊水,通常一個月就要黎一次,聽朋友講,佢睇嗰個要千幾銀一次。結果我某次偷偷地去鄰近藥房配(本身要醫生處方),一大碌,五十蚊,用咗成年都未用完。

香港醫生工會過強,實施唔到醫藥分家,外國輕微病症例如普通傷風咳會去藥房配藥,唔會睇醫生增加醫療負荷,當藥劑師認為你有需要搞唔清先會去睇醫生,醫生只會專注醫治重症。

咁既然醫療人手不足,點解仲唔實施呢?大佬,睇一個傷風咳兩分鐘收你幾舊水,咁大舊錢,點會益你藥劑佬?然後同出面啲人講,我地唔想香港醫療質素下降(咁醫生又真係專業),咪可以食埋你啲生意囉,好合理,但係一年入面因為排唔到期等到死嘅人,真係多不勝數,你我身邊都總有一個。

對於醫療人手不足嘅問題,醫生經常反映政府批得唔夠錢請多啲醫生去公營醫療。大佬,納稅人供你三百幾萬讀個學位,你唔係應該負擔應有嘅社會責任?出到黎仲要確保自己starting有幾皮野一個月?筆者認為根本一直以來香港醫生薪酬定價過高,令政府唔夠資源聘請更多人手。假如開放醫療市場,無論公私營,讓更多海外醫生於香港執業,競爭越大,按經濟原理,醫生服務價格亦會隨之降低,亦可解決輪候時間過長問題。

而種種醫療事故嘅紀律聆訊,醫委會每次一查就查五、六年,期間醫生可以繼續執業、袋糧,仲要係自己人查自己人,我諗建制如監警會嘅監察機構都唔會擺警察入去啦。醫委會習醫療事故有關嘅立法權同司法權,明顯權力過大。

講到尾都係供求問題,如果而家政府話要輸入內地教師來港執業,一定係無理,因為該行業人材過剩,但政府話增加醫委會非業界委員用以推動開放海外醫生註冊,喺求過於供嘅醫療市場,就好難唔支持。

是次議案,係在於政府霸權同醫委霸權之間嘅選擇,但係議案一獲否決,班醫生根本唔會俾你開放個市場俾外國醫生入黎爭食,筆者寧願支持689一次,都唔想再等公營等死。

希望喺facebook鳩share鳩like醫生post嘅朋友,可以有另一個角度嘅思考。

 

作者簡介:喜歡去宜家傢俬食熱狗的人。

發表意見