立場新聞 Stand News

從所謂的曱甴吸煙「實驗」ㅤ看今時今日的政府邏輯

2019/5/31 — 18:57

「大力人」YouTube 頻道影片截圖

「大力人」YouTube 頻道影片截圖

「曱甴公認生命力頑強,但原來仍敵不過一包香煙,有網民早前以玻璃樽自製『毒氣室』,以一隻曱甴為實驗對象,強迫其連續『吸食』20 支香煙,發現曱甴吸至 15 支後已奄奄一息,最後更死於香煙之下……」

節錄自 5 月 30 日《晴報》〈實測小強連食 20 支煙結果意外ㅤ前煙民籲:為自己與家人請戒煙〉

每次睇到呢啲報導就得啖笑。大佬,個樽密封㗎,咁樣連續將 20 支煙嘅廢氣放哂入樽,入面冇哂氧氣,咩動物喺入面都死啦。更何況,邊有人半個鐘頭會連續食到 20 支煙?所謂嘅實驗唔科學,最終結果就係愚民,就係誤導公眾,令到自己嗰套似是而非嘅講法成為所謂嘅「真理」。而呢一個招數,正正就係今日政府每日玩弄大眾嘅邏輯。

你問政府 A,佢哋永遠答 B。問佢哋咁做解唔解決到問題,就會答你應唔應該做;到有人質疑佢哋「搬龍門」時,就會扮哂企喺道德高地度指責你哋班人冇同理心,阻住佢哋做嘢。

廣告

今日係世界無煙日,又要講返幾句關於電子煙、加熱煙全禁嘅問題。當美國管得咁嚴嘅食品藥品監督管理局(FDA)都批准電子煙、加熱煙嘅售賣,香港卻倒轉頭要立法全禁。當四十幾個國家都有嚴格規管售賣嘅時候,香港就要學全禁嗰套,剝奪煙民選擇減害嘅自由。呢個係咩邏輯?

你同政府講科學,佢哋就同你講人情;同佢哋講自由、公平邏輯,又兜返個圈講返應然性,最後搞咗立法成幾個月,邏輯混亂,不知所云,用盡一切道德勒索手段綁架民意。政府係咪以後所有立法,都淨係只得返道德勒索呢一招數可以用?

廣告

當全世界都希望政府全禁「火車頭」,令到非煙民減少同傳統煙接觸時,政府就只係一路講全禁電子煙、加熱煙,完全冇處理呢個議題,又係咪迴避民意?立法全禁事關重大,但到今日為止,都仲未有公眾諮詢。喺呢個議題上,又將啲素來不屑一顧嘅聯署當為至寶,用佢哋支撐政府決定,大家話呢種態度係咪噁心至極?

而家法案委員會審議緊相關立法,我唯一對委員會嘅寄望,就係做返正常人應該做嘅嘢,跟返正常邏輯,唔好每事都只係得返全禁一個選擇,而係應該做返諮詢,畀返個政策選擇權畀公眾人士。

 

(標題為編輯所擬)

作者 Facebook

發表意見