立場新聞 Stand News

愉快旅程背後機師的苦況

2019/2/9 — 14:34

香港國際機場(資料圖片,來源:政府新聞處)

香港國際機場(資料圖片,來源:政府新聞處)

睇得多《衝上雲霄》,不如落返地,睇下機師嘅苦況!

一直密切留意華航飛機師罷工情況,睇住管理層嘅抹黑真係越睇越心寒,好彩都仲有唔少乘客體諒同理解平衡返!

飛機師一話要罷工……最容易俾人攻擊嘅論述係,佢哋人工高、社會地位高,好心就唔好咁貪啦!講呢啲說話嘅不乏嗰啲乜乜乜總經理、乜乜乜主管……次次睇完,都忍唔住笑啦!你班高層過去一年有幾多日唔夠瞓?你又有冇試過過勞呀?

廣告

唔知大家係咪睇得太多《衝上雲霄》,對呢個行業太多美好想像!查實每程機都面對住大量數字資訊,仲有地面無間斷、每一個航點都有嘅無線電通話,仲要 mon 住天氣變化再調整點應對……仲有仲有,求上帝保佑本身航機裏面唔好有啲咩古靈精怪嘢發生,真係一眼關七都形容唔哂佢哋駕駛室入面嘅工作!

查實華航飛機師嘅六項工會訴求已經積壓咗好耐!搞到罷工亦即係談判破裂,其實僱主負上最大嘅責任,一直毫無誠意解決困難,用返台灣朋友用嘅字眼「跳票」,即係次次都講過唔算數。

廣告

見住華航不停地拿乘客做籌碼,道德勒索班機師,但唔諗下罷工背後嘅原因,一味打壓,真係好可恥!

有客人受影響,我都明白會有唔開心同失望,不過希望做打工仔嘅可以將心比己,無人想俾老細蝦到上心口,每個機師都想平平安安做嘢~~~我成日提醒朋友,當大家每一次坐飛機享受你愉快旅程嘅時候,唔好忘記背後成就這一班航機嘅每一位工作人員到底付出咗幾多!

 

(標題為編輯所擬)
作者 Facebook

發表意見