立場新聞 Stand News

我住在「味芳」對面 街友造成的困擾 令我由支持變反對

2015/5/6 — 22:41

味芳在本周一貼出暫停派待用餐的告示。(鍾偉豐提供圖片)

味芳在本周一貼出暫停派待用餐的告示。(鍾偉豐提供圖片)

【文:勝利道街坊】

我住係對面二樓,班街友造成既困擾令我由支持變成反對。我希望大家真係去現場考察完先發表。班街友幾乎已經搬左嚟對面條樓梯住,大小便食飯以及賭錢吹水都喺嗰度露天進行日以繼夜。我個人可以忍受,但附近有好多老人家日日比佢地大聲吹水嘈醒,包括我老豆老母。呢個情況已經持續有兩年有多,每日如是,朝早九點吹到兩點半派飯,有啲街友食完一個搵人拎多個,班餐廳員工決定一人一個佢哋就發爛渣搞到人哋做唔到生意。一個老闆同本人由支持待用餐到反對或者停止無原因咩?我有見到班街友因為食唔到飯指住班員工係咁屌,咁老闆應該保護員工嗎?街坊應該保護家人嗎? 設身處地諗下如果你老豆老母仔女比人日日用粗口叫醒你會唔會出聲?

我同屋企人,同其他一樣有份捐待用餐嘅街彷都有向蕭亮聲投訴。每日都有幾個阿叔朝朝講粗口屌到我老父老母瞓唔到要起身。衛生方面,行上去佢哋打躉個條樓梯你會搵到啲屎尿賭具酒樽馬票,有幾個街友已經住埋喺入面。臭味已經傳入附近屋入面。我自己唔介意都可以忍受,但我唔忍心見到屋企人咁辛苦。另外,有人話要排斥商戶,究竟知唔知咩商戶投訴?係對面大廈二樓嘅補習社。班小朋友日日朝早聽粗口聽五個鐘,你會唔會比你小朋友去嗰度補習?

廣告

我都見到有人守秩序,而唔守秩序嘅人行為不檢導致守禮嘅人無飯食。我同屋企人同老闆都有討論過,如果由老闆下令終止派飯比不守秩序嘅人一定會遭遇反抗,所以最後我哋提出有建設性做法,在樓梯貼出告示予所有等飯嘅街友,因部分人嘅行為不檢而令到無飯派,只會導致所有人受連累,希望以街友們嘅內部壓力控制情況,但最終失敗,不守秩序嘅人甚至迫到一啲公公婆婆唔敢嚟同佢哋爭。我肯定無一支竹打哂一船人,停派飯係無辦法下嘅結果。簡單啲講,如果綜援被新移民濫用到失控,壯士斷臂係唯有嘅方法。如果你有建設性提議令到壞分子遵守秩序攞飯,請盡快提出。我相信老闆對自己嘅決定比任何人都痛心。

我哋都有諗過派籌呢個方法,但派籌時間一樣會係特定,咁結果都係一樣,因為街友們其實無地方去,佢地會坐喺嗰度等。大部份等飯嘅街友住喺近大角咀海泓道旺角嘅天橋底,太遠,佢哋唔會拎完籌返番去嗰邊再返嚟攞,最後都會坐喺樓梯,所以先有啲街友索性住喺嗰度。

廣告

另外我想講大家唔好攻擊蕭亮聲,撇除政見政黨,班街友其實係佢去天橋底做街訪嘅時候提議佢哋去味芳食飯,所以佢認為自己導致附近居民投訴,有責任,先行出嚟幫手做調停。

不喜請隨便插,但我相信有人提出實際解決方法,比未去過現場站在道德高地指指點點更好。

發表意見