立場新聞 Stand News

我們的公德心

2016/7/26 — 11:06

作者製圖

作者製圖

問一個問題,下雨天,除左總掛念從前,當你行過一條有瓦遮頭的街道時,你會收起把遮嗎?

兩個月前台灣行,五天,西門町每天下雨。

但是絕大部份台灣人行過有有瓦遮頭的地方時,都會收起把遮。

廣告

奇怪的是其他國家的人看見台灣人這些舉動後,他們都會照學。

回港後看到的依然是有瓦遮頭打開遮。

廣告

港鐵中間條扶手依然是被人攬住,而不是揸住的。

坐巴士依然是會有別人頂你張椅背,然後開住聲睇劇睇新聞同打機。

條街依然是有人一路行一路食煙。

劉江華依然是爆滿,啲垃圾依然是喺佢身邊而不是在他口內。

點解去到其他地方,在香港會發生的公德心問題都好像都減少呢?

上星期同個本土派的朋友飲野,佢結論:「因為好 X 多大陸遊客、新移民,政府一定要收緊,香港公德問題先會好啲」

我並不認同,大陸人都會去台灣、日本旅行,有無大陸人喺日本隨街大便?

可能有啦,無賣新聞姐。

真的嗎?

我覺得是就算大陸人(大部份人)去其他地方,佢地都會學習當地人的公德習慣。

而我對點解大陸人泥香港公德心特別差的結論是:「因為香港人的公德心都好差」

我爸爸是香港人,搭港鐵,佢一樣喺會衝門搶位,開大個Speaker打機。

看看身邊的人,正在做缺德事情的是什麼人,我可以肯定講,過大半是香港人。

但是為什麼我們在自己的社交平台活動時,好像每個人都係道德既化身咁呢?

因為我們只是在自己的圈子,自己的井底,以為在社交平台表達就會所有人都知。

或者佢做缺德事情的原因是,佢根本唔知自己做緊缺德事情。

其實你真正需要表達叫佢喺有瓦遮頭收起把遮?個人根本睇唔到。

就如這篇文字,喜歡的人LIKE,但是我真正想表達的對象卻永遠不會看到。

下次看見有人攬住條港鐵扶手,試下直接善意話俾嗰個人知,試下唔好剩係喺FACEBOOK度發表道德偉論自我滿足。

試下試下可能可以改變到件事。

發表意見