立場新聞 Stand News

「我哋小販唔係偷,唔係搶,唔係犯法,唔會食壞人」

2015/12/21 — 16:26

【文、圖:朝雲】

20/12 粉嶺聯和墟 北區墟市節

「咦咪就係上水嗰檔?」

廣告

市民原擬參加墟市,卻不擬見到久違而熟悉的車仔。

星期五夜深,回家飢腸轆轆,本來只剩下麥當勞。他們的車仔,是冬夜的另一選擇、暖意和氤氳。現在風聲愈來愈緊,一兩個月也未必見上一次,要看緣份。

廣告

問:您何時開始當小販?

答:2009年開始,做左六年。退休前做酒樓,廚師、點心、燒味、樓面、水吧,邊個位都做過。車仔上的字都係我寫。

退休後年紀較大,搵工較難,只能做保安員睇更,但唔適應,做唔落去。當時兩個仔還未做嘢,仲讀緊書。我係屋企經濟支柱,搵唔到嘢做,就要自力更生,熟嗰行做邊行。

當時上水天橋好多小販擺賣,咪加入依個行列。小販都係為生活工作,係社會一份子。

問:但係食環成日趕走你地。

答:政府口口聲聲話扶助中小企,我地唔係企業,但用另一說法,咪即係個體戶。

之前《明報》訪問我對美食車的看法。我咪話,有六十萬都未必得,點做啫。如果我有六十萬,已經夠我十年生活,唔駛做喇。

而家兩個仔已經出嚟做嘢,但我唔駛問仔攞錢,能夠搵到自己嘅家用。

問:你希望政府如果看待你們?

答:無牌小販就係因為政府唔發牌啫。政府發番牌,小販搵到食,政府都減輕到財政壓力。

我製作需要材料,需要工具。當我做得成,其他環節都運作到,社會就繁榮。

大陸經濟放革開放,鄧小平咪就係「讓一部份人先富起來」,包括讓小販經營。初時城管打壓好嚴,小販抗爭得好勁,咁先有萬元戶出嚟,一環扣一環,經濟先跟住繁榮起飛。而家唔駛講喇,貪污都幾十億。

啲高官話要打造國際大都會,要求整頓市容。但叫得做官,又點知民間疾苦,香港咪愈整愈差。我地小販唔係偷,唔係搶,唔係犯法,唔會食壞人。。。你食落 O 唔 OK?(筆者:好好味呀。。。)

好多上水居民都出外做嘢,返到屋企搵嘢食啫。既然 OK ,點解唔俾我地生活?

***

利益申報:市民俱驚艷熟悉的攤檔來到墟市,生意大好,伯伯亦樂於與顧客侃侃而談。訪問結束,核桃糊和杏仁糊已經賣去一半。所有義工俱獲折扣,筆者亦免費獲贈一碗,筆者屢說不便,然伯伯執意不收款。徒感奈何,唯待來日以報。

 

原刊於作者 facebook;標題為編輯所擬

發表意見